Desde cu eleccionnan na Venezuela a tuma luga e situacion y ultimo desaroyonan di e pais bisiña ta uno cu Gobierno di Aruba ta hopi preocupa pe. Prome minister Evelyn Wever-Croes a elabora, contestando pregunta di prensa durante un conferencia di prensa, riba kico ta e posicion Gobierno di Aruba relaciona cu e topico aki y e posibel reapertura di frontera.

E mandatario a enfatisa cu e situacion na Venezuela ta sigui ta un situacion preocupante pa Gobierno di Aruba. “Mi ta hopi preocupa pa sigui mira e desaroyonan, specialmente ora nos ta papia di violacionnan di derecho humano. E cos ey tin mi hopi preocupa pasobra e ta asina cerca,” el a expresa.

El a splica cu na Aruba gobierno a bin ta inverti den fortificacion di e fronteranan pa algun aña caba. El a sigui splica cu pa haci esaki nan a haya asistencia di Hulanda tambe, 11 miyon florin desde 2019 pa aworaki, pa asina fortifica e fronteranan de caso cu yega na e punto di reapertura di frontera.

“E fronteranan ta fuerte. Si nos mester habri e frontera back nos ta cla pa e reto. Tin algun trabou pa haci ainda, pero den liñanan grandi nos ta cla,” el a remarca.

Sinembargo, el subraya, no por tuma ningun decision ainda y mester warda e situacion na Venezuela stabilisa su mes. Aruba ta parti di Reino y Reino ta parti di Union Europeo (UE), y UE a asumi e posicion cu ainda nan no ta reconoce Maduro como presidente di Venezuela ainda tanten cu e no publica e actanan electoral.

“Nos mester un contraparti pa negosha cune na Venezuela y aworaki no tine. E ta un tema delicado diplomaticamente, den relacionnan internacional y den tema di derechonan humano, pero specialmente e preocupacion cu nos ta sinti,” prome minister a indica.

E mandatario a enfatisa cu aworaki no ta momento pa habri e frontera tampoco, mirando cu mester warda e situacion politico stabilisa pa despues como gobierno nan por drenta den negociacionnan back y concretisa e reapertura di frontera.

El a remarca cu mester yega un momento cu nan ta habri e frontera back, pero pa haci esaki, el a resalta, Aruba mester ta bon prepara, cual el a sigura cu aworaki Aruba ta bon prepara, y awo mester yega na palabracion.

Manera ta conoci dia 1 di mei aña pasa Aruba a habri frontera maritimo cu Venezuela. Esaki, prome minister a splica, ta basa riba bon palabracion y ta funcionando bon, pero toch no a trece e desaroyo economico cu sector comercial a kere cu e lo a trece.

Pa vuelonan directo, manera ya caba indica, mester yega na bon palabracion cu Venezuela y e situacion actual ta complica e posibilidad aki.