Aki dos dia, Aruba lo cuminsa ricibi vuelonan di diferente estado di Merca, sin excepcion. Gobierno a tuma e decision aki den cuadro di reactiva nos economia cu presencia di bishitantenan di nos principal mercado turistico.

E decision aki por a mustra uno contradictorio. Te hasta el a trece un polarisacion den comunidad entre esunnan cu ta na fabor y esunnan cu ta contra di e decision aki. Tin paisnan cu a cuminsa habri nan frontera interno y externo y te hasta nan a bira flexibel nan medidanan di higiena contra Covid, manera Spaña, y awor nan a cuminsa reenforsa e medidanan debi cu casonan positivo a cuminsa aparece bek. Na Aruba despues di mas cu un luna di Covid free, actualmente tin cuater caso importa y activo di e virus.

Dilema y economia

Bon Dia Aruba a puntra nos Prome Minister, Evelyn Wever-Croes, si na momento cu gobierno hunto cu e crisis team a tuma un decision di e embergadura aki, a pone tur cos den balans. Si berdaderamente e riesgo sanitario di habri nos frontera cu Merca – pais cu ta registra mas caso di Covid mundialmente – ta bal la pena pa activa nos economia. Tambe e impacto secundario cu lo por trece den nos relacion cu otro partner den Reino.

Premier Wever-Croes a declara cu sin duda esey ta e dilema y debate cu nan tin constante den e team di crisis. El a aclaria cu actualmente ni Corsou y tampoco Hulanda ta bay cera nan frontera, ora Aruba ta habri cu Merca. Nan a dicidi di cambia inicialmente di opinion -segun e prome mandatario- pasobra nan kier weita con e apertura aki ta bay. Tur cos ta depende con e proceso aki ta cana na Aruba. Na caminda tanto Hulanda como Corsou lo tuma nan decision, y e ta haya cu ta nan derecho pa haci esey.

Den e caso aki el a aclaria cu nos economia no ta depende di Corsou, sino di Merca. P’esey nan a dicidi di pone mas atencion riba e forma con lo habri cu Merca. E ta reconoce cu e ta keda un preocupacion, ya cu nos tin cuater caso nobo di Covid cu nos propio residentenan a importa di otro pais.

E ta kere cu e tipo di hecho aki ta mustra cu nos mester siña biba cu Covid. Ya cu dificilmente nan por bin cu un prohibicion cu tur hende por sali y niun hende por drenta. Dificilmente nos no por keda mantene tur hende na Aruba -el a laga sa- si den caso nos mester bay afo pa cualkier motibo.

Segun premier Wever-Croes, e situacion actual ta demanda di cada un di nos bira extra cauteloso pa evita e contagio di e virus. Pues e riesgo di mas contagio por bini no solamente di turismo, sino di nos propio hendenan tambe.