Nos rosea financiero lo yega net prome cu e reunion di conseho di minister di Reino tuma luga diabierna 11 di september awor.

A pesar cu ta wordo informa cu practicamente no tin negociacion cu Hulanda, ya cu nan posicion ta inflexibel den nan condicionnan pa otorga ayudo financiero na Aruba. Pero di su banda, Prome Minister Evelyn Wever-Croes a sigura cu a logra bin cu cierto cambio substancial a base di negociacion riba e proposicion inicial cu a bin riba mesa.

“Mi ta kere cu nos rosea financiero ta yega pa e dia di rijksministerraad cu ta diabierna,” el a bisa. Nan ta calcula cu nos reserva financiero actual lo yega te mita di september.

Cambionan

E mandatario a señala algun cambio principal entre otro pa loke ta trata supervision financiero, Aruba lo haya otro cu e RST cu ta conta pa Corsou y St. Maarten, mirando cu nan situacion ta diferente cu esun di nos pais. Tambe riba tereno financiero, durante dos aña Hulanda lo tuma riba su encargo refinancia nos debe cu ta caduca pa 2021 y 2022. Kiermen cu e debenan aki cu ta bay caduca, Aruba no mester bay mercado internacional pa busca un fiansa pa nan.

E ta considera esaki como un alivio, mirando cu actualmente nos rating duna pa instancianan di evaluacion manera Standard & Poor’s no ta mucho di gaba cune. Esaki ta un punto cu e prome mandatario ta considera importante y cu nan a logr’e durante e negociacion cu Hulanda.

Pa loke ta landspakket, cu ta e lista di tur e reforma cu Hulanda kier pa Aruba bin cune, nan a logra algun cambio. El a laga sa cu nan a logra un miho comprendemento di kico ta para eynan y kico ta intencion di cada un di nan. Entre nan, asunto di edad pension di 66 aña en bes di 67 aña, caminda a wordo haci un ahuste pa bin cu un estudio prome.

Tambe e asunto di benta di compania estatal caminda na principio a duna impresion cu e entidad lo dicidi cual di nan lo wordo bendi of no. E asunto aki a wordo cambia caminda prome ta haci un sondeo di e situacion financiero di e compania estatal. Igualmente Parlamento ta keda cu e ultimo palabra, ya cu den nan statuut ta para esey.

E punto di entidad cu Hulanda kier bin cune pa ehecuta entre otro e reforma, practicamente nan no a logra mayor cambio cu Hulanda. E tarea di entidad – segun e prome mandatario – ta esun di atende unicamente cu e landspakket “cu gobierno di Aruba ta duna aprobacion adelanta.”

Segun e mandatario nan a purba di limita e autoridad hopi extenso cu e entidad tabatin. E mandatario a sigura cu awe den conseho di minister e lo bin cu un proposicion pa institui un organo propio di reactivacion economico cu lo atende cu nos master plan.

Igualmente e tabata mustra un organo pa Aruba so, ya cu St. Maarten y Corsou no kier a acepta e entidad aki. Pero e ultimo documento cu a drenta siman pasa ta indica cu e ta bira un entidad pa e tres paisnan Caribense. Den e punto aki, premier Wever-Croes a indica cu lo busca mas claridad y con e cambio aki lo por afecta loke ya caba nan a yega di palabra.

Un palabracion cu nan a yega na dje tabata cu prome cu Hulanda ta tuma un decision, nan lo consulta cu Aruba. Pero di otro banda Hulanda no tabata kier cu e consulta aki ta wordo haci di acuerdo cu Aruba su deseo. E ta haya cu akinan gobierno a logra puntonan clave y nan ta den e nota di splicacion di e ley di reino (rijkswet). Pero gobierno di Aruba lo kier mira algun cambio mas den e dianan venidero, el a bisa.