Na momento cu un gobierno cay, e pregunta tocante kico lo pasa cu proyectonan na caminda a keda, vooral na e momentonan aki cu tin tension entre e dos partido di coalicion caminda prome minister a sigura cu e “lo zorg pa sigui atende retonan di tur dia.”
Dialuna ultimo, durante un conferencia di prensa di Gabinete Wever-Croes, prome minister demisionario Evelyn Wever-Croes a señala cu hendenan ta compronde kico ta pasa ora tin un gobierno demisionario na unda cu den pasado nan a yega di kita e cartera di un minister ora cu e cosnan no ta funciona, pero den e caso aki prome minister a declara cu lo tin un ‘eenheid van beleid.’
Prome minister a sigura cu e periodo cu ta bin ta bay tuma hopi di su persona cu ta esun cu ta guia e Conseho di Ministernan pa motibo cu tin hopi tension na e momentonan aki despues di caida di gobierno “sinembargo, mi lo zorg como profesional pa nos por sigui atende e retonan di tur dia,” el a bisa.
Ademas a indica cu e trabao aki ta un trabao grandi specificamente pa motibo cu e dos minister di partido di coalicion, Ursell Arends y Geoffrey Wever, tin trabao pa haci y proyectonan grandi na unda ta miho pa nan mes encarga cu esaki “vooral pa loke ta trata e diferente reto cu a mi tambe tin na mi ministerio y nos ni un ta bay tuma ministerio di otro. Nos tin cu percura cu e rumbo positivo cu Aruba tabata bayendo den dje, sigui bay asina.”
El a declara tambe cu nan ta haya hende cu ta bisa cu ta lamenta e caida di gobierno, “pasobra Aruba tabata bayendo asina bon y aworaki algo asina ta pasa, awor nos compromiso ta pa percura pa stabilidad keda, pa e continuidad keda pasobra esey ta sirbi pais Aruba y den cuadro ey, e comunicacion cu partido Raiz y cu partido MEP ta bay ta y a mi como e voozitter di conseho di minister mi mester percura pa esey cana bon y ciudadanonan no tin modo di sinti efectonan di e tension aki,” prome minister a bisa.
Riba e pregunta si ta bay over pa kita ni un cartera di ni un minister, prome minister a sigura cu “no, nos ta bay kita ni un cartera y na e momentonan aki no tin motibo pa haci esey,” el a finalisa.
Por a recorda cu na comienso di september, ministernan Ursell Arends y Geoffrey Wever a anuncia algun proyectonan pa San Nicolas unda den esey un a bin cu e idea di un Farmers Market caminda agricultornan y esnan den sector creativo lo tin un espacio permanente pa eherce nan negoshi, minister Wever a informa cu proximamente nan lo revela di kico e proyecto aki ta trata e cual tin un inversion di 4.3 miyon florin.
