Algun miembro di Parlamento di Hulanda (Tweede Kamer) a expresa cu si islanan di Caribe Hulandes no cumpli cu acuerdonan di “landspakket”, Hulanda mester dicidi si ta sigui cu e ayudo of no.

Prome Minister Evelyn Wever-Croes a splica den un comunicado di prensa cu e situacion di Aruba no ta asina cu no ta den cumplimento, pero ta reconoce cu tin algun reto cu ta atendiendo directamente cu Gobierno Hulandes cune. Un di e retonan aki ta e cortamento di 60 miyon florin den fondonan di cuido medico.

E realidad ta cu Aruba no ta yega pa cumpli cu corta 60 miyon florin den gastonan di AZV pa e aña aki, pero ta yega banda di 40 miyon florin. Aña pasa (2020) a corta 35 miyon florin caba pues esey ta haci cu a corta 75 miyon florin den gastonan di cuido medico durante di un pandemia, Prome Minister a duna di conoce. Sinembargo, Premier Wever – Croes a splica cu e ta compronde e direccion cu e Parlamentarionan Hulandes kier hiba e tema y ta reconoce nan punto. Hecho ta, e gastonan di AZV ta halto y ta subiendo hopi. Consecuentemente, mester percura pa introduci varios cambio pa Aruba por carge.

“Si nos kier para bek riba nos pianan pa nos carga nos finansas, nos mester haci cambio den AZV. P’esey a pidi AZV corta su gastonan y ta trahando tambe riba un ley pa yuda corta unda cu ta kere por corta sin cu esaki ta afecta usuarionan y/of clientenan.”

Prome Minister a splica cu Hulanda ta insisti riba algun aspecto cu mester cambia cual ta e propio contribucion (eigenbijdrage) y tambe e ‘positieve lijst’. Den corto, esaki ta encera cu ta atende cu aspectonan cu ta aumenta e gasto di cuido medico. Por haci esaki si indroduci por ehempel un costo na momento cu un persona haci uzo di ‘spoedeisendehulp’ pa un caso cu no ta di emergencia (cual ta tuma luga hopi y ta costoso).

Otro alternativa pa reduci gasto di AZV ta, cu ta introduci un costo di 5 florin por ehempel, cu un persona mester paga pa remedi cu e haya. Asina ta aumenta conscientisacion di e costo di remedi pa no acumula pochinan na cas di un remdi cu ya tin y cu ta resulta cu despues algun ta bay benta afo. Importante den esaki ta cu no por impone un cambio/decision asina riba gruponan den comunidad cu no por page, Premier Wever – Croes a enfatisa.

Locual cu Gobierno no kier, ta pa un persona malo no haci uzo di servicio medico pasobra e no por page. Pues lo percura pa tin un sistema ‘vangnet’ pa e gruponan vulnerabel manera esnan cu entrada abao, esnan cu tin pensioen y pa esnan cu ta ricibi bijstand.

Cu esaki Prome Minister ta ilustra cu ta trahando riba solucionnan pa baha gasto di AZV, cual ta algo cu Hulanda ta pone hopi presion riba dje. Ora esaki ta cla lo evalua si e ta den balans y lo introducie. Ta pidi solidaridad di esnan cu si por page, pa esnan cu no por page pa di e forma aki aumenta conscientisacion di e balor di e seguro medico y pa hunto por baha e gastonan di cuido medico na Aruba.