Pa Prome Minister, Evelyn Wever-Croes, e entrada hudicial cu Ministerio Publico (OM) a haci siman pasa den cuadro di e caso Avestruz, a cay manera un sorpresa. Ademas el a descarta cu como gobierno nan no tin ‘arte ni parte’ den e investigacion aki.
Wever-Croes a bisa cu a pesar cu hopi tempo, desde cu e tabata den oposicion, nan ta bin papiando di iregularidad di otorgamento di tereno, hopi hende no a kere cu un entrada hudicial lo a pasa mas. E ta haya cu esey ta e importancia ora bo ta duna husticia su espacio pa husticia funciona.
Pero tambe e ta un señal bon cla cu Aruba no kier e tipo di scandal y corupcion mas. “Corupcion ta perpetua pobresa,” el a bisa. Ya cu pa medio di corupcion un grupito ta keda rico y e grupo grandi ta keda pober, el a expresa durante un conferencia di prensa ayera.
Como minister encarga cu integridad, premier Wever-Croes ta lamenta cu Aruba su nomber ta cay den luz negativo pa caso di corupcion. Pero di otro banda e ta orguyoso cu como pais ta wordo investiga caso di corupcion. “Y sin miedo nos ta atende cu esunnan cu por ta responsabel” el a bisa
El a declara cu esaki ta e di dos caso di corupcion grandi cu ta wordo investiga. E prome tin di haber cu ex minister Paul Croes den e gabinete anterior, kende a yega di haya un condena, y awor su caso ta den apelacion. Y actualmente un caso di investigacion ta tumando luga riba ex minister Benny Sevinger kende tambe tabata miembro di e gabinete anterior.
El a cualifica corupcion como un cancer den bo sociedad. P’esey nan a bin cu un vision pa implementa integridad cu e mandatario a tilde di ‘bastante ambicioso.’ Den cuadro di esaki gobierno di Aruba tin pensa ratifica e aplicacion di e tratado contra corupcion di Nacionnan Uni.
