Durante un conferencia di prensa cu gobierno a ofrece pa e medionan local, prome minister Evelyn Wever-Croes a splica e posicion di Aruba pa loke ta trata e ceramento di frontera cu Venezuela.
Prome minister a comenta cu dia cu Venezuela a dicidi di habri su fronteranan cu Aruba y Brasil, gobierno di Aruba a tuma e decision di laga e frontera cera, pa motibo cu e pais no ta prepara ainda pa un fluho grandi di persona cu lo por bin.
El a bisa cu nan a consulta e decision aki hunto cu Hulanda, y nan contesta tabata cu Aruba hunto cu Corsou y Boneiro, un frontera so nan tin cu Venezuela, y nan no por keda habri un frontera si y esun di otro pais no. Hulanda a expresa cu nan lo bay papia cu Venezuela riba esey.
Wever-Croes a expresa cu ora nan a haya e notificacion oficial, tabata normal cu Venezuela ta habri frontera cu Aruba so y no cu demas islanan. Di mesun manera, el a comenta cu Venezuela no a capta e mensahe cu Hulanda a manda pa nan, y den esey gobierno a dicidi cu ta hopi importante tambe pa nenga e permiso cu boto y avion mester pa por yega na Aruba.
Tambe el a referi cu Hulanda, dia 14 di mei ultimo, a emiti su declaracion na Venezuela cu nan tampoco no ta reconoce e decision di habri solamente e parti di frontera cu Aruba, y asina mes, Merca diaranson ultimo tambe a dicidi di cera e frontera cu Venezuela.
Wever-Croes a splica cu e motibo cu nan a dicidi di cera e frontera pa un luna so ta pasobra ley ta stipula cu mester pone un periodo, y pa via di esey nan a pone un luna, pa wak con e situacion por resolve den un luna. Pero tambe el a bisa cu lo por extende e fecha.
En cuanto algun polemica politico cu a surgi tocante e contacto cu gobierno di Aruba tin cu e gobierno di Venezuela, Wever-Croes a manifesta cu e ta kere cu na e momentonan aki, e situacion ta hopi serio cu e crisis cu Venezuela tin. El a bisa cu e declaracion di e vice-presidente di Venezuela, Delcy Rodriguez, unda nan a bisa cu tin contacto cu gobierno di Aruba, a resulta cu no ta corecto.
“Gobierno di Aruba no tin contacto cu gobierno di Venezuela.” Asina mes el a expresa cu e unico contacto cu nan tabatin, ta trata di mas di un aña pasa cu e canciyer minister di Relacion Exterior, despues di consulta cu Hulanda.
