Segun Prome Minister, Evelyn Wever-Croes: E-Government no ta bay kita trabou di ambtenaar

Prome Minister, Evelyn Wever-Croes a sigura nos comunidad cu nan trabou di implementacion di E-government ta importante pa nos pais. Pero esaki no kiermen cu empleadonan publico ta bay perde nan trabou pa via di digitalisacion di aparato gubernamental. E meta tras di e digitalisacion aki ta pa realisa e trabou di un forma mas eficiente y transparente pa tur hende por haya un oportunidad.

A pesar cu tin hopi ambtenaar ta traha den servicio di gobierno, y cu e gasto di personal ta halto, di otro banda na e momento aki tin un scarsedad di empleadonan publico. Practicamente tur departamento tin scarsedad. “Nan ta pidi nos pa haya mas hende pa asina por atende cu e trabou mas miho,” el a declara.

Pero actualmente e scarsedad aki ta keda existi, ya cu gobierno no ta tumando mas ambtenaar na servicio. Mas bien nan tin cu baha e cantidad di empleadonan publico pa asina gobierno por tin un miho control riba finansa publico. E gasto di personal ta esun cu tin mas peso riba nos presupuesto, y Hulanda ta bin presionando pa baha e gasto aki.

Digitalisacion y BID

Sinembargo e Prome Mandatario di Aruba a haci e aclaracion aki debi na loke e ta cualifica como ‘cierto rumornan’. Den sentido cu ta wordo bisa cu e empleadonan di Bureau Interne Diensten (BID) ta bay perde nan trabou, ora cu e proceso di sistematisacion ta full implementa.

El a splica cu si pa ehemplo nan ta digitalisa un proceso di un departamento, caminda 10 hende tabata traha riba dje, pero ora bo ta digitalisa cinco hende so ta keda traha riba dje, e otro 5 hende por bay haci otro tipo di trabou den gobierno. Wever-Croes a bisa cu e digitalisacion ta bay acopla cu transformacion y capacitacion. Y nan lo tene cuenta cu tur empleado publico.

El a probecha pa felicita BID, y personalmente el a bay dialuna ultimo cerca nan pa gradici pa e trabou cu nan ta haci. Un biaha mas e prome mandatario a sigura na empleadonan cu ta traha den e departamento aki, y tur otro empleadonan publico, pa ‘no cay den e bruhamento di tera.” E mandatario a indica cu nan oponente politico ta purba di bruha e empleadonan cu cierto rumornan. Igualmente el a declara cu cualkier cambio semper ta bay den consulta cu e departamento, caminda empleadonan ta crece nan puntonan dilanti. Ademas no tin un ley cu ta pone cu gobierno por kita empleadonan publico, si nan ta bay den digitalisacion.

Un gran cantidad den departamento di gobierno tin di haci cu filemento y ora proceso di digitalisacion di documento ta wordo full implementa, hopi di e trabou aki no ta wordo haci manual mas. Pero e mandatario a priminti cu e trahadonan aki no lo wordo manda cas, sino cu nan lo bay na otro reto cu trabou mas interesante, agradabel y importante cu ta trece hopi mas placa aden tambe.