Segun prome minister, Evelyn Wever-Croes: Comportacion y disciplina di comunidad ta fundamental pa bay bek na normalidad

Lo yega un momento cu nos lo mester cuminsa convivi cu e coronavirus/Covid-19, manera nos a yega di conbibi cu otro virusnan den pasado. Con leu e realidad aki ta for di nos?

Ya caba Prome Minister, Evely Wever-Croes y minister di Salubridad Publico, Dangui Oduber, a bisa cu esaki ta depende di varios factor, prome cu nos pais Aruba ta bay bek na normalidad. Considerando cu nos economia ta basa principalmente riba turismo, y specialmente riba e mercado Mericano, esaki ta trece cune un reto adicional pa nos isla.

E prome mandatario a bisa cu nos lo habri nos acceso na nos turistanan bek ora cu nos sa cu nan no ta bin trece e virus aki bek pa nos. Ta conoci cu e situacion na Merca ‘ta hopi indicativo ki ora a nos cuminsa bay bek na normalidad,’ el a bisa contestando un pregunta di Bon Dia Aruba

Pero los di e situacion di e coronavirus na Merca, internamente tin trabou cu mester tuma luga prome cu nos ta bay na normalidad. E prome mandatario a bisa cu actualmente nan ta trahando ariba nan, y nan ta preparando ariba e escenario ey, ora cu ohala pronto nos por yega na e normalidad bek.

Tanten tur e medidanan introduci te aworaki lo keda vigente te dia 19 di april, y no lo tin cambio te proximo aviso. Mientras cu scol lo keda cera te dia 11 di mei.

Sinembargo minister presidente ta haya cu nos ta bayendo “Ok” pero tin algun preocupacion cu ta depende di e comportacion di nos comunidad mes y disciplina pa sigui atende cu e Covid-19.

Un preocupacion a wordo vocifera diasabra anochi pa Sharline Koolman di DVG kende durante interpretacion di e cifranan y casonan, nan por a ripara cu tin 42 caso secundario cu ta gelink na un caso positivo. Di nan tin 17 di e 92 casonan cu a produci e 42 casonan aki. Es decir nan ta casonan produci den nos contacto diario mes, es decir localmente ta sacando mas caso positivo constantemente.

Conforme na e adres nan por a saca afo cu tin 11 clauster (kiermen mas cu 2 persona) cu ta forma un total di 25 pashent positivo nobo. Tin un caso cu cinco miembro di e nucleo familiar, mama, tata y tres yiu cu a test positivo pa Covid-19. Koolman a conclui bisando cu: “Pa nos esaki kiermen simplemente nos no ta atendiendo nos mes na reglanan di higiena y di distanciamento social den nos propio cas.”