Minister Presidente Evelyn Wever-Croes a referi na e carta cu supuestamente a wordo emiti pa Secretario Interino di Conseho di Minister, tocante e solicitud haci pa e compania Aruba Airlines pa por realisa vuelo entre Venezuela y Merca, uzando Aruba como un destino di transito.
Categoricamente, e prome mandatario a bisa: “E carta ey no ta autentico. E carta ey ta cambia.”
Tin un investigacion andando – segun e mandatario – riba e autenticidad di e carta aki, cu a sali publica den medio di comunicacion, entre otro na Bon Dia Aruba. Ya cu e carta publica a wordo cambia, el a bisa. E prome mandatario a indica cu nan ta evaluando e consecuencianan. “Na e momento aki e ta parce mi cu ta un consecuencia mediatico”, el a declara.
Wever-Croes a agrega cu e tipo di publicacion aki no ta un cos cu no tabata mag di sali. Tampoco e no ta un cos cu ta valido of ta falso. E ta cualifica cu e carta aki ta un ‘poco bieu’, ya cu el a wordo cambia y e situacion tambe a cambia na caminda, ya cu un carta ta hiba su bida.
Nan tin cu evalua e caso aki miho, pero inicialmente e incidente aki ta mustra cu mas bien den media el a haya mas atencion, cu e consecuencia cu e mesun carta por tin.
Wever-Croes a bisa cu e carta cu e matutino aki a haci referencia na dje, durante e conferencia di prensa di ayera, ta uno cu a wordo cambia. Ya cu un tipo di carta asina niun di e ministernan, tampoco nan secretario, ya sea titular of interino, di Conseho di Minister ta traha algo asina, sin niun fecha y sin un destinatario.
E mandatario a confirma cu tin cantidad di corespondencia cu nan a intercambia entre gobierno y Aruba Airlines. E no ta nenga cu Secretario Interino di Conseho di Minister a hiba corespondencia riba Aruba Airlines. Pero tambe Departamento di Aeronautica Civil a yega di manda corespondencia pa nan tambe. Pero tur corespondencia cu gobierno ta manda ta aparece na kende e ta bay dirigi y e fecha.
E ta considera como algo usual cu secretario di Conseho di Minister of esun interino por emiti carta, ora ta duna informacion riba decisionnan tuma den seno di Conseho di Minister. Pero esaki lo wordo sigui despues door di un oficialisacion, pa medio di e minister concerni atraves di un decreto of carta, etc.
Potret di 24ora.com
