Manera reporta durante weekend, Conseho di Minister di Reino durante nan reunion diabierna no a duna aprobacion na e plan di gobierno di Aruba, presenta pa prome minister Evelyn Wever-Croes, pa amiendanan den ley di supervision financiero.
Conseho di Minister di Reino (Rijksministerraad, RMR) na lugar di aproba e propuesta di gobierno di Aruba, a duna mandato na Secretario di Estado, Alexandra van Huffelen pa asina e por negocia den nomber di RMR sin cu mester warda te e siguiente reunion di Conseho di Minister di Reino.
Wever-Croes a indica den declaracionnan pa prensa cu durante su bishita cortico e siman aki na Hulanda, a atende e reunion di Conseho di Minister di Reino unda tabatin riba agenda e cambionan di Ley di Supervision Financiero di Aruba, LAft. Segun Wever-Croes, tabata na ultimo momento cu Hulanda a propone tres condicion nobo.
E prome condicion ta tocante maneho financiero, unda ta pidi minister di Finanzas pa duna informacion adicional di maneho financiero. E di dos ta e palabracionnan cu Aruba mester haci cu Colegio di Supervision Financiero (CAft) riba e tema di gastonan di personal prome cu e ley drenta na vigor. Y e di tres condicion tin di haci cu proyectonan PPP.
Tocante e proyectonan PPP, Wever-Croes a bisa cu “e gobierno anterior a mara Aruba cu e debe di PPP proyecten cu financieramente a haci Aruba hopi daño” y esey ta e motibo cu Gabinete Wever-Croes no ta haci uso di PPP mas y a palabra esaki tambe cu Hulanda.
Sinembargo, a el a agrega cu “tin posibilidad pa usa otro proyecto di otro tipo di PPP cu si por ta bon.” El a duna como ehemplo cu minister di Husticia ta purbando pa yega na un prison nobo pa Aruba, y cu lo mester usa un tipo di PPP pa esaki. El a indica cu ta na mesa cu CAft pa esaki. Tocante CAft, el a bisa tambe cu “gobierno di Aruba kier duna CAft un rol tambe ora cu un gobierno kier bay pa un PPP, pasobra nos no kier pa tur gobierno den futuro bay usa un PPP manera gobierno anterior a haci.”
Den siguiente dianan, gobierno di Aruba lo ta na mesa di negociacion cu Secretario di Estado pa Relacionnan di Reino, Alexandra van Huffelen, pa purba yega na acuerdo riba e tres condicion aki, cu e meta pa ricibi aprobacion di Hulanda pa e cambionan den LAft den proximo simannan.
