E siman aki a sosode un acontecimento historico cu e caida di prijs di petroleo. Pa prome biaha e prijs di crudo a conoce un balor negativo.
Esaki debi cu tin tanto oferta di petroleo y poco demanda, cu no tin sitio pa deposita nan, te ora cu economia por reactiva y prijs di crudo por cuminsa subi bek.
Gobierno.
Gobierno di Aruba ta consciente di e oportunidad di oro aki, awor cu pa medio di un ley conoci como Ley di Citgo aproba pa mayoria di e fraccionnan di e partidonan di coalicion di gobierno, pais Aruba ta haya for di Citgo tanto e terminal como infrastructura di e refineria, cu ta inclui e tankinan na San Nicolas.
Dialuna anochi, prome minister Evelyn Wever-Croes a declara cu e tankinan cu nos tin na San Nicolas, mayoria di nan ta den capacidad pa cuminsa almacena. Aunke el a bisa cu no tur ta den e capacidad aki, pero pa condiciona nan y pone nan den bon estado, mester di inversion grandi cu aworaki nos no tin disponibel. E mandatario a informa cu gobierno ta buscado forma pa uza e tankinan disponibel pa almacena e crudo mundial disponibel.
“Tin un negoshi hopi lucrativo eyfo. Y Aruba tin e tankinan aki pa ofrece,” el a bisa.
Sinembargo, premier Wever-Croes a laga sa cu ainda falta algun detaye pa caba di firma e acuerdo di terminacion cu Citgo, pa asina por bay over pa huur e tankinan aki.
Igualmente y considerando cu e prijs di combustibel a baha substancialmente, e prome mandatario ta haya cu muy probablemente esaki lo bay tin su influencia riba tur loke nos ta haci, muy specialmente riba prijs di gasolin. “E ta algo cu ta yuda nos masha hopi mes,” el a bisa.
Crisis petrolero.
E crisis di coronavirus ta afecta economia di henter mundo y tambe e cranchinan pa bende petroleo internacionalmente.
E demanda di petroleo a collapse debi cu mayoria di hende ta cera den nan cas y mayoria di e fronteranan ta cera como un medida pa evita cu e virus aki lo por sigui plama.
No tin vuelo ni crucero y masha poco auto ta circula debi na e medidanan di restriccion cu e gobierno di cada pais a bin cu ne. E situacion aki a ocasiona cu tin hopi cantidad di petroleo cu no ta wordo uza, y logicamente nan mester bay algun caminda.
Den e caso aki si e no ta wordo uza, e paisnan productor mester deposita nan te ora cu e prijs por subi bek. Pero e capacidad di petroleo cu mundo henter por almacena a cuminsa conoce un limite.
A pesar cu Organisacion di Paisnan Productor di Petroleo (OPEP) a bay di acuerdo pa bin cu un recorte record di nan produccion global di aproximadamente un 10% entrante 1 di mei awor, esaki no a soluciona e problema. E disminucion di nan produccion ta uno record. Nunca antes nan a yega di conoce un reduccion record asina. Aunke ya caba ta wordo premira cu e medida aki no lo ta suficiente pa contraresta e caida di e demanda di petroleo y su prijs riba mercado internacional.
Te hasta e paisnan producto ta pagando e paisnan cumprando pa bay cune, debi cu nan tin temor cu nan capacidad pa mantene nan petroleo den depositonan ta birando menos. Merca a cuminsa yena nan reserva nacional y strategico caba. Merca ta e pais cu tin e reserva strategico mas grandi di mundo, y nan tin capacidad pa 800 miyon di bari deposita den nan takinan di Texas y Lusiana.
