Segun prome minister demisionario: Si MEP keda den e siguiente periodo di gobernacion pueblo lo mira mas inversion, mas alivio y lo sigui paga debe

Recientemente Bon Dia Aruba a combersa cu prome minister demisionario Evelyn Wever-Croes. Cu eleccion den porta Bon Dia Aruba a dirigi pregunta na e mandatario tocante coalicionnan entre MEP y otro partidonan chikito y plannan di partido MEP pa e siguiente periodo di gobernacion.

Despues cu tanto Gabinete Wever-Croes I y II a cay prome cu tempo, comunidad tabata comenta cu partidonan di coalicion cu a sinta cu MEP no a termina bon y den siguiente eleccion nan a bay atras. Bon Dia Aruba a puntra prome minister Wever-Croes kico ta e impresion y posicion di MEP pa cu esaki.

El a subraya cu esaki no ta berdad. El a splica cu na 2017 MEP no a gana den eleccion, AVP a gana, pero nan a laga sa cu nan no kier forma un coalicion. E ora partido MEP a forma coalicion cu partido POR cu tabatin dos asiento y partido RED cu tabatin un asiento.

El a splica cu final di Gabinete Wever-Croes I partido POR a implota despues cu ex minister Otmar Oduber a retira for di partido POR. Alan Howell a bira lider pero no tabatin realmente un partido.

El a sigui splica cu ex minister Marisol Tromp, ken a tuma over pa Oduber, no tabata gosa di e sosten di su propio fraccion, cual tabata un situacion complica, pasobra partido POR a pidi’e pero e no tabata kier y esey tabata e implosion di partido POR. “No ta nos a causa cu partido POR no a bin back,” el a remarca.

Di otro banda tabatin partido RED. Prome minister a splica cu casi tur siman tabatin manifestacion di e veld di enseñansa y e veld no tabata kier atende cu minister Lampe. El a indica cu aunke Lampe tabatin ideanan hopi bon, tin biaha e ideanan tabata bay hopi dilanti y esaki a crea conflicto den e veld di enseñansa.

Aworaki gobernacion den coalicion a yega su fin, El a resalta cu e no por bisa cu MEP a kibra partido RAIZ. El a destaca cu e ta sinti cu comunidad, vooral riba tema di adultonan mayor cu ta un area cu minister Arends a traha duro riba dje, ta sostene e partido y ta aprecia e maneho cu a ser hiba.

Bon Dia Aruba a puntra prome minister Wever-Croes si despues di dos gobernacion cu partido MEP pueblo por spera cambionan grandi den cierto area of por spera un poco mas di e mesun maneho.

El a subraya e hecho cu aworaki tin stabilidad financiero cu espacio financiero locual kiermen cu riba e tereno financiero ta bay tin cambio. El a splica cu no ta bay tin necesidad di ahuste, di medida, di cambia sistemanan drasticamente pasobra manera cu e entrada ta bayendo aworaki, manera e sistema di impuesto ta aworaki y cu e proyeccion riba termino largo,gobierno ta bay haya locual tin mester.

“Esey ta un cambio pasobra si bo wak back atras nos mester a tuma decisionnan dificil y eseynan no mester wordo tuma den e tempo nos dilanti. Nos tin cu sigui ta prudente si, nos mester sigui riba e caminda cu nos a cuminsa di finanzas publico sostenibel duradero.,” el a resalta.

Prome minister demisionario a menciona cu aworaki Aruba ta den negociacion cu Hulanda cu sosten di IMF pa revisa e normanan financiero. El a indica cu nan ta yegando na un convenio cu Hulanda pa loke ta e normanan y si esaki ser concretisa esaki lo duna gobierno espacio pa mas inversion.

El a enfatisa cu esey ta algo cu pueblo lo mira mas di dje den e trayecto nan dilanti, mas inversion. Esaki ta algo cu no a mira den e gobernacion cu a caba di termina pasobra placa mester a bay pa paga debe y pa tur e necesidadnan.

E mandatario a agrega cu ademas tin espacio financiero pa duna alivio tambe. El a destaca cu un di e metanan di e partido ta pa baha costo di bida y pa haci esey, el a indica, mester haci cosnan diferente. Un idea cu el a menciona ta pa gobierno ta un di esnan cu ta inverti den un liña di transporte entre Colombia y Aruba pa trece carga for di Colombia.

“Si MEP keda den gobierno bo ta bay mira mas inversion, bo ta bay mira mas alivio cu ta bay wordo duna na e gruponan mas vulnerabel y sigui paga e debe,” el a enfatisa.

Ex minister Otmar Oduber a indica durante su entrevista cu Bon Dia Aruba cu e surplus cu gobierno ta papia di dje no ta un surplus di berdad pasobra gobierno n a baha su gastonan y a haya mas placa a traves di impuesto. Bon Dia Aruba a puntra prome minister Wever-Croes kico su pensamento ta tocante e comentario aki.

El a splica cu e surplus ta un combinacion di ambos. El a indica cu entrada di gobierno no a aumenta door di medida, pero a aumenta door cu economia a crece. El a resalta cu gastonan di gobierno a baha hopi durante pandemia y despues di pandemia a subi back.

Prome minister Wever-Croes a sigui splica cu a haci analisis den gastonan di gobierno cu ta aumenta y un categoria di gasto cu ta aumenta ta gasto di interes, y pa e motibo ey tambe ta importante pa yega na un acuerdo cu Hulanda pa soluciona esaki.

Otro categoria di gasto cu el a menciona ta subi ta gastonan di operacion. El a destaca cu logico cu si mester haci mas e gasto di operacion ta aumenta. El a enfatisa cu berdad tin cierto categoria di gasto cu ta subi, pero esaki ta directamente relata na e servicio cu ta ser ofreci.

Pa loke ta gasto di personal, un topico cu tambe ta ricibi hopi atencion, e mandatario a indica cu Departamento Recurso Humano, cu ta cay bou su ministerio, tur aña desde 2017 a publica un jaarverslag di su ministerio caminda por mira con e cantidad di empleado publico a bin ta bahando.

El a resalta cu e ta na un nivel historicamente abou pa loke ta cantidad di persona cu ta traha den gobierno. El a señala cu nan a traha pa baha e gastonan di personal, pero e situacion ta cu si hasta e cantidad di empleado keda igual e gasto ta subi pasobra nan ta haya promocion, nan ta haya indexering, entre otro.

“Ya caba caminda cu nos por a haci e aparato mas small nos a haci’e, pero awor nos ta den espacio pa sigui haci’e mas small cu digitalisacion cu her-en ombijscholing den personal, pero e gastonan ta cuminsa aumenta poco poco…no exorbitante manera antes, pero si na un forma cu bo ta bay wak e,” el a remarca.

Bon Dia Aruba a puntra si partido MEP tin algun plan of vision pa e tereno di refineria. Prome minister Wever-Croes a indica cu pa e tereno di refineria e plan ta redestinacion di e tereno. El a resalta cu como gobierno nan a haci lo maximo pa wak si por bolbe bin otro refineria eynan y e conclusion ta cu no. Pero otro tipo di refineria si, refinerianan mas limpi y di por ehemplo green hydrogen.

El a elabora cu primeramente ta bin e parti di limpiesa di e tereno. Riba e tereno tin metal cu tin hopi balor. E meta di e limpiesa ta tambe pa recoge e metal aki y bende pa asina esey paga pa e limpiesa y si tin diferencia cu mester paga e no ta bay ta asina grandi.

E mandatario a sigui splica cu tin un parti di e tereno cu ta contamina. E parti aki no ta bay ser sanea y lo keda destina pa e parti industrial y no ta bay bira residencial ni comercial. EL a indica cu e parti di e tereno mas cerca di caya grandi, e cura cu tin eynan ta ser basha abou pa tin acceso te na lama y eynan lo por bin desaroyo di cierto vivienda y localnan comercial.

El a sigui splica cu despues ta e parti mas cerca di Rodgers Beach. Den e area aki, el a indica, algun tanki lo keda na e waf aki pa warda cos cu tin mester y e idea ta pa crea un tipo di waf pa yatenan luhoso y hasta ta ser papia di un terminal crucero.

E mandatario a indica cu e parti mas patras caminda tin e parke di panel solar ta un tereno hopi grandi y eynan tin un parti cu por ser desaroya pa vivienda. El a resalta cu gobierno mester fondonan halto pa desaroya esaki y aworaki cu tin espacio financiero por haci’e pasobra vivienda ta un punto hopi halto den e lista di prioridadnan di MEP.

El a destaca cu e redestinacion di e tereno ya caba ta riba papel y RdA ta esun cu tin e tereno den su maneho y a cuminsa cu e ehecucion caba.