Prome minister Evelyn Wever-Croes, ken tabata den Parlamento di Aruba e dia di ayera pa papia tocante e investigacion di Arubahuis, a afirma cu Corte di Casacion a duna su veredicto den e caso IBIS.
“Awe Corte di Casacion a duna su veredicto den e caso IBIS y el a bisa cu e no ta mira motibo pa cambia e veredicto cu HOF a duna pa caso IBIS”, el a bisa.
Ta trata di e caso di ex-minister Paul Croes cu a wordo sentencia pa HOF cu tres aña di prison pa delitonan di labamento di placa, participacion den un organisacion criminal, aceptacion di soborno, mal uso di su funcion como minister y defalco.
Sinembargo, Bon Dia Aruba a tuma contacto cu e ex-mandatario Paul Croes e cual a sigura cu loke a sali ayera ta e reaccion di PG di Hoge Raad, “awor huesnan di Hoge Raad lo dicidi. Lo dura di 8 pa 10 luna”, Croes a señala.
Sinembargo, redactor di Bon Dia Aruba a tuma contacto cu e ex-mandatario ken a sigura cu “Dia 13 di december procurador di Hoge Raad (Cassatie) a reacciona riba e “middelen” cu Profesor mr. Stijn Franken a introduci den Corte di Casacion na Hulanda. Dia 29 di September defensa di ex-minister Paul Croes a entrega su caso den Corte di Casacion na Hulanda (Hoge Raad) y ayera finalmente PG di Hoge Raad a reacciona. Awo Hoge Raad lo dicidi riba e caso aki y esaki por dura 6 pa 8 luna segun calculo di e defensa di Paul Croes ken ta wordo representa den Corte di Casacion pa profesor ken ta un abogado hopi respeta y renombra den corte di Casacion. Ta lamenta cu prome minister Evelyn Wever-Croes ta usa un reaccion di PG Hulandes pa mal informa Parlamento y comunidad cu e sentencia di Paul Croes a wordo ratifica. Ainda huesnan di Hoge Raad no a wak e caso. Pero ta parce cu Evelyn ta pura pa mira Paul Croes tras di trali”, e ex-mandatario a señala na redactor di BDA.
Ademas, tambe el a informa cu huesnan di Hoge Raad na e momento aki lo bay studia e caso pa mira si en berdad abuso contra derecho humano a wordo haci den e proceso di su detencion.
