Ayera mainta durante conferencia di prensa prome minister Evelyn Wecer-Croes a reacciona ariba e decision di Hoge Raad den e caso di Fundacion Orguyo di Aruba y un pareha local di personanan di mesun sexo cu kier casa na Aruba.

Manera ya caba ta conoci, e caso aki ta un caso cu a bay den casacion despues cu Corte di Husticia di Aruba, Hof, na december 2022 a tuma un decision caba den e caso aki. Na momento cu Aruba a haya su Constitucion a pone den articulo uno di e Constitucion tin poni cu no ta permiti discriminacion y segun Hof ta indica, na momento cu no ta permiti parehanan di mesun sexo casa esey ta un discriminacion cu no ta aceptabel pasobra e ta viola e propio Constitucion.

Ademas corte a bisa na december 2022 cu e ta un discriminacion y cu no mester ningun ley pa legalisa matrimonio di mesun sexo, pero simplemente door cu e ta un discriminacion automaticamente Censo mester sigui e instruccion aki.

E mandatario a splica cu na momento Corte a duna su sentencia na december 2022, gobierno a evalua e decision y a busca conseho di un abogado di casacion, y ademas, el a agrega, nan a haya peticion di alrededor di 18 mil persona na Aruba cu a firma y a pidi gobierno pa bay den casacion.

“A evalua tur esaki y a evalua e consehonan cu a haya di e abogado di casacion, a evalua e peticion di e 18 mil personanan aki cu a acumula firma y a entrega esaki tambe, y asina a tuma e decision cu ta bay casacion,” el a señala.

Gobierrno a bay casacion y diabierna ultimo Hoge Raad a tuma su decision y a bisa cu nan ta confirma loke corte a bisa na december 2022. Esey ta nifica cu tin discrimnacion door di no permiti parehanan di mesun sexo casa y esaki ta un violacion di Constitucion di Aruba. Basa riba esaki ta ripiti instruccion na Censo pa bay over na permiti matrimonio di personanan di mesun sexo tuma luga di mesun forma cu matrimonio entre personanan di sexo opuesto ta tuma luga.

“Cu esaki a bin decision final den e discusion aki. Riba casacion no tin nada otro, tampoco un referendum na e momentonan aki pasobra loke cu Hoge Raad a haci ta simplemente duna interpretacion na Constitcuion di Aruba y un referendum no por bay riba un Constitucion.

Un referendum lo por mustra cu tin cu cambia un Constitucion den futuro, pero esey ta un procedura riba su mes y uno diferente pa cana,” prome minister a remarca.

Cu decision di Hoge Raad desde aworaki parehanan di mesun sexo por casa na Aruba y e mandatario a resalta cu Censo ta prepara pa ehecuta e veredicto aki.

“Mi deseo grandi lo ta cu nos por uni un biaha mas, laga nos diferencianan un banda y sigui traha riba bienestar di nos pais. Esaki ta un tema hopi controversial cu a crea un desunion grandi den nos comunidad. No di awo, di hopi tempo, y no na Aruba so, otro caminda tambe. Sinembargo aworaki cu nos tin un decision final, laga nos biba cu esaki, laga nos respeta esaki y laga nos sigui manera un comunidad cu nos ta,” el a finalisa.

Pa loke ta adaptacion di sistema di Censo pa por cuminsa cu e proceso di matrimonio pa parehanan di mesun sexo, prome minister a splica contestando pregunta di un miembro di prensa, cu Censo a haya instruccion pa adapta su sistema automatisa y a haya e fondonan necesario pa esaki tambe. El a indica cu no tabata tanto placa y cu tabata un adaptacion chikito.

Na mesun momento el a remarca cu esey no ta e problema, el a enfatisa cu e hecho ta cu na Aruba tin un procedura pa casamento cu aworaki ta conta igual pa parehanan di sexo opuesto y pa parehanan di mesun sexo.

“Semper tin cierto investigacionnan cu tambe tin cu tuma luga, kiermen bo no ta bay yega nunca cu awe bo a yega y bo ta casa awe, e tin un proceso pa cana, pero nan ta ekipa cu tur cos caba pa haciele,” el a finalisa.