Despues di ricibi disculpa di parti di Minister President di Hulanda, Mark Rutte den nomber di Gobierno di Hulanda pa e pasado sclavitud, durante conferencia di prensa Prome Minister di Aruba, Evelyn Wever-Croes a contesta pregunta di un miembro di prensa tocante si esaki por hiba na ricibi un dispensacion di e debe nacional di Aruba.

Wever-Croes a splica den su contesta cu riba 8 di december nan a dialoga tocante diferente tema durante Catshuis na Den Haag cu Minister Presidente Rutte y otro miembronan di gabinete. El a sigui splica cu na e momento ey a indica, particularmente pa e gruponan di interes, cu ta hopi importante cu despues di 19 di december e wordo claramente skirbi.

El a indica cu pa esaki tin recomendacionnan di legio, suficiente recomendacionnan, cu a wordo haci y despues a señala e grupo di dialogo di pasado di sclavitud den e rapport di Cadena di Pasado y e rapport di Caricom.

Wever-Croes a remarca cu punto 10 di e rapport Caricom ta un propuesta ariba dispensacion di debenan y esey ta inclui tur e paisnan cu algun biaha den e region aki of otro regionnan a wordo colonisa.

“Pesey mi ta bisa cu no tur cos ta aplicabel un pa un pa Aruba. Nos tabata na Hulanda net e siman prome hunto cu Minister di Finanzas pa indica precisamente cu Aruba no ta tras di e dispensacion di debenan. Aruba kier paga e debenan back; pero nos tin mester claridad di Hulanda con nos mester paga e debenan di corona back”, Prome Minister a enfatisa.

Tocante esey, el a señala cu ya caba tin combersacionnan andando cu entre otro Secretario di Estado pa Relacionnan di Reino, tocante refinanciamento, e pago back, ki termino, etc. “Nos no a yega niun acuerdo ainda tocante esey y mi no por indica tampoco ki interes nos lo desea di paga of no, esey ta wordo dialoga na un otro mesa.”

Prome Minister a agrega cu importante cu e diferente gruponan di interes cu ta bezig cu e tema aki pa añas caba, y cu a duna nan recomendacionnan, wak tambe cu algo ta wordo haci cu e recomendacionnan. “Esey tabata e rason di mi apoyo pa e carta di dia 9 di december”, el a finalisa.