Sindicato STA cu ta representa un grupo di trahadonan di Post Aruba no ta di acuerdo pa gobierno corta 12.6% destina pa e fondo di solidaridad (FASE) for di e subsidio limita cu e compania estatal aki ta bin hayando for di e mesun gobierno pa sobrevivi.
Presidente di STA, Diego de Cuba a declara na e matutino aki cu e situacion di Post Aruba ta uno di ‘canta macamba.’ E compania aki ta practicamente subsidia cu un presupuesto di 3.8 miyon. P’esey nan a haci e sugerencia na minister Chris Romero pa laga full e placa ey pa keda den post.
El a argumenta cu esaki ta un situacion reinante no solamente na Aruba, pero rond di mundo tambe, caminda servicio postal a resulta seriamente afecta. Tur esaki debi na innovacion digital y uso di plataforma online cu a kita un pida considerabel di e servicio cu mundo postal tabata ofrece. Adicionalmente e situacion di Covid crisis a contribui mas pa afecta e sector aki.
P’esey STA a haci e sugerencia na minister Romero pa laga full e subsidio destina den nan presupuesto pa Post Aruba. E sindicato aki ta di opinion cu Post Aruba ta un compania fragil y si gobierno ta kita e 12.6% pa e fondo di solidaridad lo tin su efecto pisa pa Post Aruba. Ya cu e ta un suma di casi 480mil for di un subsidio di 3.8 miyon florin. Apart cu Post Aruba ta den problema financiero caba, si gobierno ta bay kita e 12.6% cu nan por haci bon uso di dje. “Nos ta bisa cu no ta prudente pa haci esey,” segun e sindicalista de Cuba.
Mirando e hecho cu Post Aruba ta den un situacion dificil, STA ta considera prudente pa laga e placa di 3.8 miyon pa Post Aruba por sobrevivi. E ta haya cu esaki ta e mesun situacion cu otro companianan estatal cu pa basta tempo ta pasando den un situacion dificil, manera Arubus y Serlimar. “Asina bo por sigura su sobrevivencia. Y sigura tambe cu e trahadonan ta keda na pia di trabao,” segun presidente di STA.
Esey tabata un di e puntonan cu nan a trata cu director di Post Aruba y tambe cu representante di e cartera di minister Chris Romero, caminda Post Aruba ta resorta, pa cuminsa cana e caminda pa wak si nan por yega na un protocol.
E reunion aki a conta cu intermediacion di Mediador di Gobierno, Sr. Anselmo Pontilius, pa wak si e partidonan por yega na un acuerdo pa un tempo defini. STA ta boga pa un tempo defini y no indefini, manera a wordo proponi.
“Nos no kier tende di tempo indefini. E mester ta defini,” el a declara. Ya cu si nan ta papia di un acuerdo indefini e kiermen cu e por dura por ta 30 aña mas. P’esey STA kier un protocol pa tempo defini. Y si mester bin back nan mesa, despues di e termino di e protocol pa reevalua e situacion, STA ta dispuesto pa haci esey tambe.
