Comunidad cada bes ta cuestiona su mes, ora cu un sospechoso di comete violacion contra nos ley penal no ta wordo castiga, si uzo di Hulandes como idioma exclusivo riba tereno di husticia lo por ta un causa cardinal pa stroba aparato hudicial haci su trabao debidamente.
Un punto di discusion tin di haci si polis su proces-verbaal ta mal traha na Hulandes. Locual por a bira un di e motibonan cu husticia no ta wordo aplica manera debe ser. Si Ministerio Publico (OM) no por persigui esunnan cu a comete infraccion contra ley. Pero tambe cu personanan cu no a cumpli cu ley no por a para responsabel dilanti corte, y cu hues no por a duna sentencia ehemplar riba nan, debi cu proces-verbaal no ta bon traha.
Presidente di Sindicato di Polis di Aruba (SPA), Jose Dirksz no ta haya cu uzo di Hulandes por a bira un piedra den sapato di polis pa nan realisa nan trabao manera debe ser. Ademas nan como polis tin un bon relacion cu OM, el a laga sa.
Segun sindicalista Dirksz, polis nan proces-verbaal ta di nivel y tambe nan cursonan den cuerpo policial ta di nivel. “Eynan sigur mi ta bay na defensa di mi coleganan,” el a declara na Bon Dia Aruba.
E no ta descarta cu tin biaha tin dificultad cu ta wordo presenta algun caminda. Pero den cualkier organisacion grandi manera polis bo ta haya esey, el a bisa. Pero e ta sigura y garantisa cu nan proces-verbaal (PV) ta ariba nivel.
Scol di Polis
Encuanto Scol di Polis, presidente di SPA a laga sa cu ultimo informacion for di minister di Husticia, Andin Bikker, ta indica cu e aña aki nan a logra pa klas bolbe habri.
E ta considera importante pa tur aña un klas por habri, ya cu mescos cu un klas ta habri, tin un grupo di polis cu ta baha cu pension anualmente.
El a remarca cu no mester lubida cu cuerpo di polis ta deficiente den personal. Si un aña nan ta keda sin habri un klas den cuerpo di polis, e ta haci e buraco di falta di personal mas grandi den e organisacion aki.
