Segun presidente di OPPA, Ivo Valdes: Gobierno mester paga bashi premie y gelijkbedrag cu forsa retroactivo

ORANJESTAD – Organisacion di Pensionadonan Publico Arubano (OPPA) a tuma nota cu recientemente e grupo sindical (TOPA, SEPPA, SADA y SPA), cu ta representa empleadonan publico, a reuni cu gobierno pa trata e topiconan di bashi premie y gelijkbedrag, entre otronan. Den e reunion aki, gobierno a compromete su mes pa lanta un comision tecnico pa trata e tema di indexering.

Presidente di OPPA, Ivo Valdes, a declara na Bon Dia Aruba cu recientemente premier Evelyn Wever-Croes, kende a participa tambe den e reunion cu e sindicatonan, a tuma contacto cu su persona. Den e combersacion aki –segun Valdes– e mandatario a bis’e cu nan ta bay paga e primanan ey. OPPA ta haya cu gobierno mester paga nan cu forsa retroactivo te cu 1 di januari 2015.

Valdes a trece dilanti cu durante tres decada nan a conoce tres areglo di pension caba. PVL cu a core te cu 2010; NPR 2011 cu a core te cu 2013; y awor NPR 2014, cu ta esun vigente. E cambionan aki a bini pa fortalece e fondo cu a wordo debilita pa diferente circunstancia, ya sea politico, y tambe pa e crisis mundial. Valdes ta haya cu durante e proceso di cambio ultimo, nan a pasa e pensionadonan un ‘fastball’. E tempo aya nan no a invita OPPA, pero e sindicatonan cu ta representa empleadonan di sector publico a bay di acuerdo pa elimina e asina yama ‘bashi premie’ y ‘gelijkbedrag’. P’esey, un biaha mas, OPPA ta lamenta cu nan no a wordo invita den e reunion cu gobierno a sostene cu e sindicatonan dialuna 8 di april ultimo.

Valdes a informa cu OPPA lo participa den un reunion cu lo bini cu APFA y Pensionadonan Uni, cu ta e grupo cu no a haya bashi premie y gelijkbedrag, pa asina nan sa cuanto esakinan ta bay costa gobierno. OPPA ta un organisacion cu ta percura pa salvaguardia e interes di nan miembronan pensionado di e sector publico. E organisacion aki a nace 31 aña pasa, pa sali na defensa di tur e derecho di e pensionadonan.

Encuanto si OPPA tin un rol sindical, Valdes a bisa categoricamente cu nan no ta un sindicato. Pero si nan ta un grupo cu ta defende interes di su miembronan. Sinembargo, e ta expresa cu esaki no kiermen cu OPPA no tin forsa. Actualmente, e organisacion aki tin mas cu 1,600 miembro, y nan ta liber pa manifesta tambe.

OPPA y mas participacion

Aunke nan ta un organisacion, nan ta cay den e categoria di sindicalismo, pasobra nan ta defende ex trahadonan publico. E punto aki a wordo discuti recientemente durante un reunion di SER (Sociaal Economische Raad), caminda gobierno kier institucionalisa dialogo social, locual OPPA ta haya bon, ya cu e ta yuda pa mantene un democracia interactivo. Sinembargo, OPPA un biaha mas no a haya un invitacion den e reunion aki. Locual OPPA no ta haya bon, ta e categoria cu nan kier duna e organisacion aki, como ‘un rabo di e sindicatonan.’

Den e reunion aki pa institui e dialogo social, a bin cu un organigram, caminda gobierno ta aden cu cuater delegado. Tambe e representantenan sindical cu cuater delegado, y e dunadonan di trabou cu cuater delegado. Esaki tabata un sorpresa pa OPPA, y p’esey pa medio di nan presidente, nan a reacciona. “Mi di, unda nos a keda? Nos no t’ey,” Valdes a declara.

Nan kiermen cu OPPA mag di trece problema pa soluciona den e dialogo aki pa medio di e sindicatonan, pero nan no tin derecho di vota. “Ma protesta pa esey!,” Valdes a bisa na e matutino aki.