Anuncio cu gobierno (MEP-POR-RED) a haci recientemente pa medio di nan minister di labor, Glenbert Croes, pa aumenta salario minimo, a crea desconfiansa cerca Camara di Comercio (KvK) como gremio dunado di trabou den e dialogo tripartite social laboral.
E hoben presidente di KvK, Kawish Misier, a declara na Bon Dia Aruba cu e anuncio di Croes di bin cu un aumento di e salario minimo un dia despues cu e dialogo tripartite a cuminsa, sin consulta cu e gremio di dunado di trabou, a wordo considera como un ‘fout’ di e mandatario en cuestion. Aunke KvK a dicidi di sigui den e dialogo aki, ya caba nan tin desconfiansa. Misier a bay mas leu, di bisa cu si otro tipo di fout di e caliber aki ta wordo cometi den seno di e dialogo tripartite aki, e lo bira un dialogo bipartite.
Pa KvK, e aumento di salario minimo no ta un solucion pa atende e problema di inflacion. Sino cu e ta bira un medida mas cu ta afecta comercio, pero e consumidor tambe. Como gremio comercial nan ta mira cu gobierno ta bin cu medida y mas medida, mientras menos negoshi nobo ta habri y mas negoshi ta cera. Pasobra e costo di haci negoshi na Aruba ta demasiado caro. Pero pio ainda, nan ta medidanan cu gobierno ta bin cu nan sin consulta cu e partnernan den e veld, locual nan ta mira como un maneho ‘dictatorial’ y no inclusivo, segun Misier.
