“Mi no por imagina mi cu un desacuerdo cu tin entre gobierno, minister cu AHATA cu ta bay uza e directiva di ATA pa pone presion… ATA ta mucho importante pa nos tur”, asina presidente di hunta di supervision di Oficina di Turismo di Aruba (ATA) , sr. Jossy Lacle a declara diabierna ultimo.
El a agrega cu e no por imagina cu esaki tabata e motibo pa AHATA retira su miembronan fei e hunta aki, “sino nos ta hopi leu fei cas”.
Sr. Lacle su declaracion riba e punto aki tabata basicamente den e mesun direccion cu directora di ATA, sra. Ronella Tjin Asjoe-Croes su declaracion un dia prome riba e mesun topico.
E no sa cual ta e motibo di AHATA su decision, pero sr. Lacle a declara cu AHATA mes a tuma e decision aki. “Mi ta laga esey naturalmente na nan responsabilidad”. Igualmente sr. Lacle a bisa cu AHATA no tabata obliga pa expone den su carta e motibo pakico nan tabata retira nan tres miembro fei e hunta aki.
Sr. Lacle kende tambe ta fungi como presidente di hunta den otro organisacion, a bisa cu normalmente ta wordo respeta e decision ya sea pa motibo personal of no, cu nan ta pidi nan retiro. “No tin niun prescripcion pa bisa kico bo mester pone, gewoon bo ta tuma retiro…”, el a bisa.
Como presidente di e hunta aki, e no kier ta envolvi ya cu e ta presidente, y tur cos cu tin di haber cu maneho di ATA ta hancra den e ley di ATA mes. Den e caso aki ta minister di Turismo mes ta esun encarga di nombra y dicidi riba e miembronan di e hunta aki. Den e caso di AHATA nan tin tres asiento den e hunta aki caminda nan ta presenta dos candidato pa cada asiento di cual minister ta eligi tres di nan.
Mirando e embergadura di e decision di AHATA, sr. Lacle ta spera cu e organismo aki no lo retira su miembronan definitivamente. E ta kere cu tur miembro mester ta consciente di importancia di ATA pa turismo di Aruba. P’esey e ta kere cu nan mester por yega na un solucion pa por haya e hendenan di AHATA bek. E no kier specula actualmente riba kico lo por pasa si no lo ta asina.
