Stichting Monumentenfonds Aruba (SMFA) a yega di anuncia cu entrante otro luna nan lo cuminsa cu e trabou di restauracion di e forno di calki den Rancho.

Tambe pareu cu e obra aki, nan lo cuminsa cu e curso di tecnica di calki pa mantencion di edificionan monumental.

Fundacion Rancho
Pa Presidente di Fundacion Rancho, Clifford Rosa e anuncio aki ta uno importante no solamente pa nan como fundacion, sino pa e bario di Rancho.

El a bisa cu nan logo mes di e fundacion cu tin nuebe aña di existencia- e figura di e forno ta aparece. E trayectorio tabata basta largo pa finalmente otro luna lo cuminsa cu e restauracion di e forno di calki aki, unico den Caribe. El a elogia e trabou cu a wordo realisa conhuntamente cu Oficina di Monumento na momento cu nan a pone un seyo riba e forno como un monumento protegi.

No ta desconoci cu e punto aki tin un imagen negativo pa basta aña. Pero e ta haya cu e forno aki tin su punto cardinal tambe pa mira un cambio den e parti positivo den e bario, y asina nan kier a mir’e.

P’esey e ta kere cu e proyecto di restauracion di e forno di calki y embeyecemento di e area lo touch desaroyonan social den e bario. Den pasado cierto restauracion a yega di sosode den e bario cu e cas di torto situa na Koningstraat, caminda nan a duna oportunidad na e adictonan ambulante pa nan ta parti di dje.

E no ta descarta cu e proyecto di e forno di calki eventualmente lo por yuda pa e adictonan ambulante lo por haya un segundo oportunidad. Unabes finalisa e trabou, Stichting Rancho lo percura pa sigui tene e historia di e forno aki bibo y educa e comunidad y bishitantenan tocante e forno di calki, durante nan actividadnan y tournan.

E ta sali for di punto di bista cu e restauracion di e forno di calki situa den pleno curason di Rancho lo duna otro dimension na e bario historico aki. Pero tambe na e proyecto cu tin, saliendo for di e Museo Arkeologico purbando di restaura lo mas posibel e monumentonan cu tin den bario, y creando un miho aspecto di Rancho.

Tambe e iniciativa di SMFA pa bin cu e curso di tecnica di calki ta crea segun Rosa un oportunidad grandi pa rescata e ofishi aki cu tabata existi caba na Aruba cu tin di haber cu kimamento di calki y trahamento cu e piedranan di calki pa mantencion di edificionan monumental. E ta spera cu e cambionan cu nan tur ta desea pa Rancho por tin su inicio na momento aki.

E forno a wordo construi alrededor di 127 aña pasa, y e ta un monumento tangibel di nos historia economico y industrial. Segun informacion divulga pa SMFA, e restauracion lo tin un duracion di mas of menos dos luna. Nan ta bay cuminsa dia 24 di september y su duracion ta depende di e condicion di e monumento mes.