Inspeccion di labor ta laga di desea. Ya den pasado sindicato FTA a yega di critica e falta di control riba tereno laboral pa evita cierto abuso y falta di siguridad na pia di trabao. Vooral den e situacion di Covid cu nos ta pasando aden.
Sindicato FTA ta cuestiona cu hopi dunado di trabou enbes di atende di manera corecto cu su trahadonan, nan ta tuma e ley full den nan man, sin respeta nos leynan laboral vigente. Nan ta exigencianan cu ta poni den ley riba locual e dunado di trabao mester cumpli cune.
Presidente di FTA, Hubert Dirksz a declara na Bon Dia Aruba cu si nos tin un ley aworaki of den futuro, tin un par di rekisitonan cu mester bay cune. Un di nan ta di haci cu mester tin conocemento di e ley. E di dos tin di haci cu inspeccion y e di tres, mester tin sancion of boet.
Sindicalista Dirksz ta haya cu si e tres aspectonan aki ta tuma luga realmente, e ta kere cu nos por funciona miho. Pero e ta lamenta cu actualmente ta existi falta di conocemento di ley. Ademas ta faltta respet pa nos ley laboral. Pero tambe ta falta inspeccion y sancion.
“Nos tin un deficit basta fuerte eynan cu ta algo cu sigur mester wordo drecha,” el a bisa.
Presidente di FTA a agrega cu si nos kier pa Aruba bay dilanti y no causa problemanan social, pues e magnitud di kico kiermen manda hende cas pa e persona keda sin e trabao y sin entrada. “Bo ta contribuyendo pa problemanan social grandi cu despues bo mes ta bay lamenta,” asina e lider sindical di FTA a laga sa.
E sindicalista ta haya cu como dunado di trabao, no solamente bo ta un fuente di trabao, sino cu bo ta un ciudadano tambe, y logicamente bo mester tene cuenta cu esey.
