Presidente di FTA, e sindicalista Hubert Dirkzs a declara na Bon Dia Aruba cu e proceso di negociacionnan di contracto colectivo (CAO) ta bayendo “basta duro” den ultimo temponan.
“Nos ta calcula cu e situacion ta un poco preta pa tur hende”, el a bisa.
Di otro banda e sindicato aki tin cierto temor cu e companianan kier probecha di e situacion aki pa abstene di duna cierto beneficionan adicional na e trahadonan . E sindicalista a bisa cu FTA ta kere cu si bo kier cu un compania cana bon, bo mester tin un grupo di trahado contento. “Un trahado contento tin e tendencia di produci mas”, el a bisa.
Situacion financiero dificil
E ta haya cu no ta bon si un trahado su situacion financiero ta dificil debi cu pa hopi tempo e no a haya un adelanto ni di salario, tampoco di condicion di trabou, sino al contrario tin faboritismo y explotacion den empresa, etc… tur esaki no ta bon pa un empresa.
E ta kere cu e dunado di trabou no mester duna hopi, pero si nan por duna algo, y no mester ta placa so, pero si e ta un combinacion di placa, condicionnan di trabou y trato honesto y husto, nan ta haya cu e trahadonan ta keda contento.
Sinembargo e ta observa cu e salario minimo a bira e maximo y e maximo dianan di vakantie tambe a bira e maximo. Ultimo tempo den negociacion di CAO, nan ta mira cu ora cu FTA ta entrega un proposicion den nomber di nan trahadonan pa negosha un CAO, nan ta haya nan mes cu e compania ta abstene di reconoce beneficionan pe trahadonan.
“Nan ta bisa bo gewoon cu nan ta duna bo cero aumento y cero beneficio”, segun presidente di FTA.
E ta haya cu asina ey “no por!”. Mientras cu di otro banda nan por ripara cu e prijs di tur producto na Aruba a aumenta. Esaki apesar cu e prijs di petroleo a baha y cu nos sa cu na Aruba tin e fenomeno di hedding cu a causa daño na e posibilidad di probecha di e baha di prijs di petroleo.
Medidanan
Ademas el a critica e hecho di un “gobierno cu a bin cu bastante medida cu a haci e costo di inversion di negoshi halto na Aruba, segun presidente di FTA. Apesar di e factornan negativo aki, FTA ta haya cu tin “un tiki di espacio” cu e doño di negoshi lo por yega na un acuerdo cu e trahadonan cu tur hende ta keda contento.
Lamentablemente ora cu e costo di bida ta subi aunke no halto, pero sinembargo e situacion ta bira preta pa tur hende, segun sindicalista Hubert Dirkzs. E ta haya cu e echo aki ta haci cu dunadonan di trabou ta faha duro riba e trahadonan. “Nan ta bisa bo cu no por, mientras cu hopi biaha nos tin duda den e cifranan of splicacion cu ta wordo duna”, el a bisa.
