Segun presidente di FTA, sr. Hubert Dirksz, no ta cuestion cu sindicatonan kier sinta ariba stoel di gobierno cu nan recomendacion pa gobierno ataca e problematica di insiguridad y criminalidad riba nos isla.
“Hamas…hamas nos no kier sinta den stoel di gobierno. Pueblo a vota pa e politico di Parlamento, y Parlamento ta pone su gobierno. E Parlamento ta supone di controla e gobierno. Lamentablemente esey no ta tuma luga manera mester ta”, presidente di FTA a declara na Bon Dia Aruba
Siman pasa varios sindicato entre nan FTA, SPA y SADA a propone un serie di medida di biaha, termino corto, medio y largo caminda nan ta urgi gobierno di Aruba a implementa nan como parti di e solucion pa contraresta e problematica aki.
E lider sindical a bisa cu como sindicato nan ta kere cu pa un sociedad funciona bon nos mester tin gobierno, pero tambe Parlamento cu ta consisti di politiconan, gremionan, caminda nan mester ta hopi critico pa mester tuma luga loke nan ta yama “check and balances” . Mester tin e poder di control caminda cada grupo di nos sociedad mester traha ariba un nivel. E ta haya cu si “bo no por funciona ariba un nivel bo ta haci daño na e desaroyo di e sociedad”.
Loke nan por a ripara –segun e sindicalista di FTA- durante e ultimo añanan ta cu e prioridad pa loke ta e presupuesto di pais Aruba a laga hopi di desea. E ta haya cu sigur den e situacion di criminalidad nan ta wak cu un gran parti di e problemanan di criminalidad ta bini di pafo. Pero tambe tin problema cu ta bini di paden di nos pueblo entre nan e problematica di drop out cerca nos hobennan y nite club cu ta keda habri te casi 24 ora y circulacion di hopi arma ilegal cu ta bin di afo. “Ta wordo bisa semper, un pueblo cu problemanan social grandi y cu ta crece principalmente cerca hobennan ta e origen di criminalidad”, segun e veterano sindicalista.
Algo nan ta ripara tambe ta cu si bo tin instrumentonan como gobierno pa preveni criminalidad of atende miho cu e problema aki, y si nan no ta duna atencion manera mester ta, nan ta bay hinca nos pais den problema. “Mi ta kere cu nos tur ta yama pa tira un bista y percura pa nos pais tin un sociedad mas sano”, el a bisa. Specialmente considerando cu nos ta un pais cu ta depende di turismo. Nos ta un isla chikito –segun presidente di FTA- di apenas 100 mil y pico hende y con nos por tin problemanan asina grandi. Mientras cu nos ta un pueblo cu ta ricibi cantidad di placa fei di nos industria turistico. “Akinan ta falta responsabilidad cu no ta wordo asumi y te hasta por bisa cu falta seriedad y falta di respet pa nos mes”, segun sindicalista sr. Hubert Dirksz.
