Sindicato FTA a celebra su di dos congreso extraordinario di un dia so diaranson ultimo. E sindicalista y presidente di FTA, sr. Hubert Dirksz a destaca e importancia di e congreso aki, caminda nan a delibera riba diferente aspecto cu tin preocupa nos comunidad y tambe nan a trata nan propio preocupacion interno. El a considera e congreso aki como exitoso. Casi 50 delegado a participa den e congreso aki
“Nos ta contento cu e resultado ya cu e ta yuda nos organisacion cada momento cu nos ta bini hunto pa evalua y coregi y tuma decision al respecto. Esey ta hiba nos un paso pa dilanti”, el a bisa.
Esaki ta nan di dos congreso, y segun nan statutonan, nan ta organisa tres congreso extraordinario minimo anualmente. Si ta necesario, dependiendo di e situacion cu nos comunidad ta pasando aden, nan lo pone mas. E delaster lo tuma luga na luna di november proximo.
Relato financiero
Den e tipo di congreso aki nan ta duna cuenta no solamente di nan relato financiero di 2013, pero tambe nan ta duna cuenta di tur nan desaroyonan di loke nan ta biba den mundo sindical y trabou di cada dia manera formacion, keho y situacion cu e trahadonan ta confronta nan mes den e campo laboral.
Pa trata e cuenta anual di 2013 e compania PWC a duna un presentacion pa asina mustra e “seriedad di e organisacion”, segun presidente di FTA. E tipo di presentacion aki ta trece transparencia riba e maneho financiero di e organisacion sindical aki pa asina e delegadonan ta keda informa y compronde kico ta pasa cu nan placa y contribucion di e trahadonan afilia na FTA.
Critica
E congreso tabata critico di parti di e delegadonan sindical caminda e congreso aki ta bira un plataforma pa nan por intercambia y tuma decisionnan cu ta bienestar di e trahadonan y na beneficio di e organisacion. Nan a libera mas tanto riba asuntonan interno.
Nan a papia riba e manera con e dunado di trabou ta atende cu e trahadonan riba dos parti. Un di nan segun sindicalista Dirksz tin di haber cu tin desconfiansa den e dunado di trabou di e manera con e ta traha cu e empleadonan of e miembronan di e sindicato. Pa e motibo aki den e congreso e delegadonan a exigi pa FTA ta mas skerpi, cauteloso y mas fuerte ariba e dunadonan di trabou cu ta faltando respet pa e trahadonan cu “hopi biaha ta pone trampanan”.
E di dos punto cu e delegadonan a trece dilanti e problema caminda na momento cu e compania tin un par di trahado cu ta haci abuso di e baymento di AO, e trahadonan otro ta haya cu nan no mester paga pe. “ E companianan ta pone medidanan hopi pisa pa ora cu nan ta bira malo nan tin cu cana un caminda di cruz innecesariamente”, el a bisa.
Ademas di esaki e topico di all inclusive no tabata un excepcion den e congreso extra ordinario di FTA. Su presidente a bisa cu nan a papia “levemente” riba e topico aki cu ta un ley cu a pasa caba y tambe ariba asunto di refineria y otro asuntonan mas cu tin di haber cu nos comunidad.
