Pa loke ta e di cuater tranche of prome kwartaal di 2021 di ayudo financiero of prestamo na cero interes cu ta inclui e lunanan di januari, februari y maart, esaki a cambia un poco debi cu na luna di december pais Aruba a haya un adelanto riba dje. Awor pa haya e resto di placa ta depende di e contesta cu CFT ta haya for di gobierno riba nan rapport.
Prome Minister, Evelyn Wever-Croes a declara cu gobierno no a haya e suma completo debi cu Hulanda tabata kier pa CFT mester revisa e presupuesto di 2021 prome. Esey a sosode recientemente caminda e organo di supervision financiero aki a traha su conseho. E mandatario a laga sa cu su colega di Finanzas, Xiomara Maduro tabata den e fase final di contesta CFT su preocupacion.
E ta kere cu unabes cu e preocupacion aki ta contesta suficientemente, Aruba ta bay back riba agenda di Conseho di Minister di Reino pa asina nos pais lo por haya e otro mita pendiente di e tranche di e prome kwartaal aki.
E prome mandatario no ta premira mas condicion. Pasobra awor cu nan tin e landspakket a base di e acuerdo firma cu Hulanda na luna di november ultimo, e ta spera cu esaki tabata e unico condicion. “Ohala cu esey ta e condicionnan. Y no bin mas den porta di cushina tampoco…”, el a bisa. E ta spera cu aworaki no lo bin mas condicion, pero si e continuacion di e condicionnan.
Awor cu gobierno di Aruba a acepta e landspakket controversial aki, e ta kere cu nos por sa delanta kico e condicionnan ta, y nos pais ta cumpliendo cu nan, segun minister presidente. Na luna di januari tabatin algun deadline cu gobierno mester a cumpli cu nan y e luna aki cu nos a cuminsa, tin algun mas.
“Nos ta cumpliendo cu nan satisfactoriamente,” el a declara. E prome mandatario a aclara si cu no tur cos ta bayendo shen porciento, pero si satisfactoriamente. Esey ta e feedback cu nan ta hayando di Hulanda tambe.
