Segun polis: Mas o menos 8 mil hende a celebra apertura di Refineria di Aruba

Diasabra anochi a tuma luga e fiesta di apertura di e refineria. Un cantidad grandi di persona a presenta na Carnival Village pa asina pasa un rato agradabel.

Segun polis, nan ta calcula cu tabata tin mas o menos 8 mil persona cu a presenta na e celebracion nacional. Un par di mil hende a probecha di e campaña special cu Refineria di Aruba (RdA) tabata tin. RdA a regala 5 mil florin na bonnan di 100 florin pa cada ganado.

“Nos a keda hopi satisfecho, esey tabata un berdadero celebracion di pueblo”, asina Alvin Koolman, director di Refineria di Aruba, a duna di conoce riba escenario. A yama “bonbini” na RdA y na Fuels Marketing & Supply (FMSA).

FMSA ta e compania cu ta maneha 5 stacion di gasolin na Aruba y ta entrega combustibel na tur e otronan, cu ta mas o menos 13 otro stacion cu tin otro propietario. Separa di entrega combustibel den forma di gasolin, diesel y kerosin na e stacionnan, tambe FMSA ta encarga pa entrega combustibel na aeropuerto pa e avionnan.

E agrupacionnan y DJnan cu a presenta diasabra a varia for di DJ Mike Ross, OBS Brassband, presentacion di Popcorn Dancers, Vince Irie, Tsunami Aruba, Janiro Eisden, Le Groove, show di vuurwerk, OREO y pa cera e anochi, a presenta e reina di Soca, esta Destra.