Diaranson di Shinishi cu ta marca e inicio di e temporada di Cuaresma, pastoor Toti Fuentebella di parokia Sta. Filomena na Paradera a bira e di tres ciudadano, y e prome religioso cu a ricibi e vacuna BNT162b2di Pfizer contra e virus di Covid-19 na Aruba. El a forma parti di e grupo di 12 ciudadano a wordo selecta pa cuminsa oficialmente cu e campaña di vacunacion contra Covid cu a tuma luga na Centro Don Bosco.

Mayoria di nos comunidad ta profesa doctrina Catolico. P’esey pastoor Toti a declara na Bon Dia Aruba cu e dia ey a bira un bunita oportunidad pa e tuma e vacuna. El a laga sa cu e decision aki ta un decision personal y boluntario, pasobra e no ta obligatorio.

E ta haya cu ta varios e motibonan pa kico el a haci’e. Un motibo ta basa riba interpretacion teologico. Na prome luga pastoor Toti ta haya un obligacion pa proteha e don di bida cu Papa Dios a dun’e. Pa asina e por cuida su salud y e bida di otronan, particularmente bida di su parokianonan. “Tur dia mi ta haci misa. Si mi tin Covid, e ora mi ta contamina otro,” el a bisa.

Tambe el a cita Papa Francisco ken a yega di declara: “Mi ta kere firmemente cu mester tuma e vacuna eticamente. Esaki no ta solamente un opcion sino un escogencia etico, pasobra nos no mester risca nos salud, nos bida, y bida di otronan.” Pastoor Toti a agrega cu akinan nos ta papiando di bienestar comun di hendenan y henter comunidad.

Na di dos luga, pastoor Toti ta bay riba aspecto di moralidad. E ta haya cu tuma e vacuna no ta solamente pa cuido y proteccion di e salud di e ser humano, sino e ta basa riba e bienestar comun. E bienestar comun ta recomenda pa tuma e vacuna precisamente pa proteha esunnan debil, esnan cu ta cay den grupo vulnerabel y tur esunnan cu ta traha den sector di salubridad. Pues ta moralmente aceptabel pa tuma e vacuna, el a bisa.

E di tres punto cu pastoor Toti a trece dilanti pa argumenta pakico el a dicidi di vacuna ta basa riba declaracion di nos Obispo Catolico, Monseñor Luis Secco.

E pandemia aki a causa hopi morto rond mundo, hopi hende malo y un crisis cu no ta solamente den nos sector di salubridad, sino el a afecta nos bida social, economia y hasta nos bida spiritual. No ta tur hende por bin misa y participa den e celebracionnan sacramental, specialmente e celebracion di Sta. Eucaristia. “Pues, ta nos speransa y oracion pa preveni y pone un fin na e plamamento di e virus aki,” el a expresa pa medio di un comunicado. Nos Obispo, Msgr Secco ta encurasha e necesidad pa tuma e vacuna aki pa asina preveni y proteha e comunidad y coopera pa stop e plamamento di e virus.