Parteranan awo ta hayando mas y mas pregunta di personanan na estado preocupa pa sa nan riesgo pa loke ta Zika. Segun informacion colecta pa Bon Dia, parteranan ta dunando nan clientenan tur informacion cu nan ricibi for di Despa y recomendacionnan di prevencion for di GKMB. Ta haya tambe cu pa e parti di prevencion di sangura, tin poco informacion den media y cu kier mira mas di dje.
Segun Michael Quandt partera na Baby Love Aruba: “E mesun informacion cu Departamento di Salubridad Publico ta duna na tur hende, ta e mesun informacion cu nos ta haya. Pues cu personanan mester gewoon cuida rond di nan cas na di prome luga pa preveni cu tin cria di sangura. Esaki ta sumamente importante tambe den caso di un persona na estado tambe pa evita tur sorto di sangura rond. Locual cu nos como partero ta haci ta nos ta evalua e parti di si tin di haber cu sangura, si of no, anto nos ta tene cuenta cu e periodo cu e hendenan ta den nan embaraso.”
Segun Sr. Quandt ta splica e comienso di e embaraso ta e periodo di mas importante pa cuida y pa no laga nada pasa e curpa. No ta pa Zika solamente, pero pa Dengue y Chikungunya tambe e recomendacionnan ta cual ta custuma di duna e hendenan caba. Banda di esaki ta duna e hendenan algun folder cu ta haya for di Departamento di Salubridad y GKMB. “Den caso cu haya un pensamento cu un caso lo por ta algo asina, ta busca moda pa manda carta pa dokter di cas di biaha. Dokter di cas ta esun cu ta busca moda pa confirma e sospecho of no. Den caso cu ta haya cu dokter di cas tarda, ta bay directamente Departamento di Salubridad publico kende ta canalisa e afspraaknan e ora pa tur cos bay mas lihe cu ta posibel. Como e ta importante pa haya sa mas lihe pa por confirma esey tambe.
Informacion
A puntra Sr. Quandt si ta hayando hopi pregunta di futuro mamanan pa con e situacion ta hinca den otro pa Zika. El a bisa cu awo ta hayando mas y mas pregunta, mirando tambe con media ta treciendo e informacion dilanti. Sr. Quandt ta haya cu media mester pone mas atencion na yuda conscientisa e comunidad den maneranan di prevencion y cuida nan curpa, cas y pafo di cas. E ta di opinion cu hopi atencion a bay riba e parti negativo. “Naturalmente tin posibilidad pa consecuencia negativo, y ta pesey tur partera ta manda hendenan na estado pa haci ecografia na comienso di nan embaraso y rond di 20 pa 23 siman di embaraso como cu esey ta e simannan cu atrobe ta wak si tur cos ta cana bon.”
Ta haya e casonan tambe cu un persona no sa of tin duda, y como partera tin experiencia di fula barica y grandura di baby, semper nan ta wak si tin motibo pa manda haci un control extra cerca specialista. Den caso cu tin cualkier duda of sospecho ta papia cu e famia prome y mustranan e rol importante di cuida curpa y cuida rond di cas. “Ta haya casonan cu nan ta bisa cu na nan cas ta bon, pero ora cu nan bay cerca un famia eynan si tin sangura, cual ta un punto di atencion caba cu nos ta purba haci nan consciente di dje.” Tambe e partera ta splica cu e ta informa e futuro mamanan cu nan tambe por yama GKMB nan mes si nan ta sintie e necesidad.
Segun Sr. Quandt ta fastioso cu un partera no por haci ningun control di sanger riba un hende cu ta na estado pa loke ta Chikungunya, Dengue of Zika, Pasobra e ta trabou di e dokter di cas.
Personanan na riesgo
E ta asina cu nunca sa sigur kico ta andando den tur caso di hende na esatdo, pasobra tin casonan di personanan cu no tin seguro. Y si nan no tin seguro, nan ta warda te na ultimo momento pa bay un dokter of specialista, pa motibonan financiero. “Esaki ta fastioso pasobra nan ta perde e temporada di screening.” Unabes perde screening e por trece problemanan grandi como cu ta hopi laat, el a agrega. “Nos como partera ta keda urgi tur hende pa bay dokter, ilegal of no. Un persona cu ta ilegal no ta segura y no tin dokter di cas tampoco, pues e parti di ilegalidad ta e parti cu ta duna mas problema como cu nan no ta ricibi guia profesional, unda cu ta forma e grupo di riesgo.” E ta splica cu e hendenan aki ta haya miedo di bay un dokter pa no wordo gara mientras cu hopi ta lubida cu tur hende tin derecho riba salud. E partera ta bisa cu e grupo di reisgo aki lamentablemente ta core riesgo pa haya mas problema y no Zika so, pero cu alimentacion tambe por ehempel.
“E ta deber di tur hende pa cuida nan curpa, unda cu nan bay. Tin hende cu no ta sigur y si nos no por confirma nada pa nan, por haci palabracion cu specialista pa wak pa un eco extra. Teniendo na cuenta cu AZV tin su reglanan cual ta cu mester tin un motibo medico pa haci screening extra.
Terminando el a bisa cu como profesionalnan no a sinta hunto pa loke ta e caso di Zika ainda como cu na Aruba ainda no tin ningun caso confirma di Zika ainda.
Otro parteranan
Segun partera na Duna Lus ta informando nan pashentnan cu tin Zika na e paisnan rond di nos y cu na Aruba nada confirma ainda pero ta mustranan riba e posibel risico di esaki, ta recomenda haci uzo di crema pa evita hay mordi di sangura (repelente), ta mas cu por den airco entre otro. Awoki nan tambe ta hayando mas y mas pregunta di e futuro mamanan. For di salubridad nan a manda un folder pa print, pero como cu e no a sali mucho cla pa lesa, a traha uno nan mes cual nan ta duna e futuro mamanan. In2care ta algo cu Pestcontrol tin cu nan ta recomenda personanan busca tambe pa yuda combati sangura rond di nan cas. E ta un trampa cu atrae sanguranan unda cu nan ta biba y eynan tin un bacteria cu e sangura ta haya den su curpa cu ta mata e sangura dentro di djies dia, su larva, e partera a bisa. Cas di Partera Aruba a indica cu nan no a ricibi nada ainda for di Salubridad pero si ta sigui nan update y locual at sali den media pa guia nan pashentnan, cu tin pregunta.
