Un carta a bay pa presidente di parlamento, Ady Thijsen, caminda ta solicita un reunion pa trata tres rapport. E rapportnan di Contraloria General (ARA) a wordo entrega final di aña pasa na Parlamento, tocante: Overtime, otorgamento di subsidio y proyectonan PPP (Private Public Partnership).
Parlamentario di MEP, Shailiny Tromp-Lee ta considera cu e rapportnan aki por yuda nan como miembro di nos organo legislativo pa eherce nan trabou debidamente. E ta haya cu nan tin miembronan cu ta domina cierto materia, y cu tin cierto experticio a base di nan trayectorio profesional for di unda nan a bin prome cu nan a bira parlamentario. Sinembargo nan no ta domina tur materia. P’esey e ta haya cu e rapport cu ARA a presenta na nan, ta un instrumento hopi importante cu por yuda e parlamentarionan haci nan trabou debidamente.
Nan a haya cu rapport di un investigacion cu ARA a haci tin di haci cu e parti di overtime. Tromp-Lee a bisa cu e organo aki a sak’e for di perspectiva di e departamentonan cu mas ta refleha gastonan di overtime structura cu ta cuerpo policial (KPA), Instituto Coreccional KIA y Cuerpo Especial Aruba (CEA). E ta complementa un conseho cu nan a ricibi for di e colegio di supervision financiero (CAft). “Esaki sigur ta algo cu nos mester duna debido atencion,” el a bisa.
Otro rapport ta relaciona cu otorgamento di subsidio pa medio di gobierno y con e proceso aki ta wordo encamina. E por imagina tur exigencia cu e instancianan cu ta ricibi subsidio mester cumpli cabalmente cu e reglamento di subsidio.
Pero di e rapportnan aki un cu Tromp-Lee a duna debido atencion y cu el a dedica hopi tempo na fin di aña ultimo, tabata e rapport relaciona cu e proyecto PPP.
Den e rapport aki, ARA ta investiga dos proyecto grandi cu ta Green Corridor y Watty Vos Boulevard y cu ta costa pueblo alrededor di 700 miyon florin. Na luna di december ultimo el a manda 24 pregunta y e ta na spera di nan contesta
Segun Tromp-Lee, el a analisa e rapport y e conclusion cu a keda presenta, y tambe e referencia cu ta wordo señala, tin di haci riba con parlamento a laga di haci su trabou. “Pasobra ta wordo conclui cu nos como parlamento no a keda informa debidamente. Nos no a haya suministro di informacion na momento cu nos mester a haya esaki pa por a tuma un decision,” asina e parlamentario en cuestion a bisa. Pero di biaha el a aclaria cu e mes no tabata den parlamento na e momento ey. Pero como parlamentario, e ta kere cu nan tin cu saca conclusion cu por mehora nan presentacion como miembronan di e organo legislativo.
