Un biaha mas e controversia entre ex minister di Infrastructura, Benny Sevinger y minister actual di e mesun cartera aki, Otmar Oduber, ta sigui scala rond di e denuncia di iregularidad den otorgamento di tereno di gobierno. Esaki despues cu a keda divulga riba red social un denuncia publico di dos ciudadano di fam Morales y Rodriguez tocante acto iregular di otorgamento di tereno cu otro persona di fam Corona.

Parlamentario Sevinger a nenga cualkier involucramento cu cualkier caso di corupcion. Mientras cu a sigura cu den pasado el a yega di ataca cualkier acto iregular y te hasta el a yega di haci denuncia cu si a duna resultado. Pero e tin duda cu e tipo di investigacion cu minister actual a instrui director di DIP lo por produci algun resultado.

El a declara cu ya a caba e mesun mandatario a declara cu ningun di e personanan envolvi den e acusacionnan aki ta traha pa gobierno di Aruba, y menos pa su Ministerio y tampoco personalmente pe.

Tampoco cerca Ministerio Publico (OM) lo bin ningun investigacion cla, na luga cu e propio mandatario mes bay haci e tipo di denuncia aki pa clear su nomber y no laga DIP hacie. “Bo ta kere cu director di DIP ta bay investiga su propio minister?. Bo ta kere e ta bay Ministerio Publico pa bisa: Tende investiga mi minister…,” el a bisa.

Igualmente Parlamentario Sevinger ta bisa cu DIP no ta wordo nombra den henter e scandal aki, sino cu e mesun minister di Infrastructura ta envolve DIP den e grabacionnan cu a wordo divulga. Segun Servinger henter asunto aki ta un caso di corupcion total den DIP cu minister actual ta envolvi den dje.

El a bisa cu tin voicemail di e tal Corona cu ta indica cu el a papia cu e minister actual. Pues e ta considera cu tur asunto di bin cu un investigacion interno den DIP y tambe pa haci un denuncia formal cerca OM pa un caso di posibel soborno of estafa ta un ‘smokescreen’ pa e minister di Infrastructura por scapa su curpa for di locual e ta hinca den dje

Igualmente el a pidi pa pasenshi debi cu tur iregularidad cu ta tumando luga actualmente na DIP ta wordo benta riba su persona. Pero parlamentario Sevinger a pidi pasenshi, ya cu na su momento e berdad lo sali cla, ya cu e caso di corupcion ta mucho mas grandi di loke apenas a cuminsa sali publicamente.