Faltando apenas un dia pa Conseho di Minister di Reino trata den su agenda e punto central di e ley di supervision financiero- Landsverordening Aruba financieel toezicht (LAft)- Parlamento di Aruba lo sigui cu su posicion di mantene e cambionan cu nan a introduci den e ley aki cu a causa malestar cerca Hulanda. Asina Parlamentario y lider di fraccion di MEP, Rocco Tjon a confirma na Bon Dia Aruba.

El a bisa cu nan a bin cu un amienda cu a cambia e indole di LAft pa percura cu e ley aki por cuadra cu nos Constitucion y Statuut. “Anos ta para atras di locual nos a entrega,” el a declara.

Posicion firme
El a reitera cu Parlamento di Aruba ta keda para tras di nan puntonan y dicon nan a bin cu e cambionan aki. Pero di otro banda nan no ta reuni cu gobierno di Reino, ya cu esaki ta tarea di gobierno. P’esey nan no sa kico ta nan pensamento, aunke logicamente den medio di comunicacion ta wordo expresa cierto indicacion.

Sinembargo, Parlamentario Tjon a laga sa cu sigur dos punto nan ta sigur di dje: Parlamento di Aruba no ta bay aproba niun otro ley. Y otro punto cu ta sigur y cla pa nan ta, cu segun nos leynan vigente, gobierno di Reino no por duna un KB (Koninklijk Besluit) pa un cambio cu Parlamento a haci.

El a bisa cu aworaki e bala ta den skina di gobierno di Reino. E no ta descarta cu semper nan por tuma un decision contra tur esencia di nos estado di derecho y contra tur base legal. P’esey e no ta descarta cu si den caso gobierno di Reino ta scoge pa actua contra nos Constitucion y Statuut, y duna Aruba un KB pa motibo di un cambio cu un organo independiente di un pais autonomo a haci, Parlamento di Aruba lo cana nan caminda tambe.

Consensus rijkswet
Encuanto si den caso cu gobierno di Reino lo bini cu un ley di supervision financiero di Reino mes -cu ta loke ta wordo sospecha cu eventualmente lo por sosode- parlamentario Tjon a laga sa cu un ‘consensus rijkswet’ no ta riba mesa mes.

Ademas e ta sigur cu Gabinete Wever-Croes no kier un ‘consensus rijkswet.’ El a emiti tambe su opinion como miembro di nos organo legislativo caminda Parlamentario Tjon di su banda tampoco lo acepta un ‘consensus rijkswet.’ El argumenta cu den un ‘consensus rijkswet’ nunca un partido por sali for di dje. “Un consensus rijkswet sigur pa nos no ta un opcion,” el a bisa.

Sinembargo nan mester warda ki decision gobierno di Aruba ta bay tuma. Te ayera merdia e no tabata sa cual tabata e decision aki. Parlamentario Tjon a declara na Bon Dia Aruba cu nan ta na espera di dje. Nan sa cu tin diferente reunion no formal cu ta tumando luga den e ambiente politico. Pero reflexionando riba e aspecto formal y huridico, e asunto di e cambionan cu a wordo haci den e ley di LAft, e ta sigura cu no por ta un argumento pa Hulanda interveni y duna un KB. “E no por! E ta simplemente imposibel,” el a bisa na e matutino aki.

Decision y Constitucion
Parlamentario Tjon a subraya cu no obstante di e decision cu ta wordo tuma, e ta considera importante pa tur cos cana segun nos Constitucion y na bienestar di pais Aruba.

El a agrega cu e proceso ta defini den nos Constitucion y si gobierno ta scoge pa no ratifica e ley aki, nan mester manda un carta na Parlamento y splica cual ta e motibo. Na e momento ey -segun parlamentario Tjon- Parlamento lo por tuma un decision. El a sigura cu Parlamento y particularmente fraccion di MEP, no ta bay trata niun otro ley di LAft, si esun cu nan a trata y aproba no ta wordo ratifica.

El a declara cu nan ta hopi calmo riba con e proceso aki ta bayendo, ya cu nan ta consciente cu tur cambio cu nan a haci a bay segun consehonan, entre otro di e mesun organo consultativo (Raad van Staten) di Hulanda. Igualmente nan ta trankilo pasobra nan ta haya cu e maneho cu gabinete Wever-Croes ta hibando riba finansa publico ‘ta uno responsabel.’

Te hasta el a wordo confirma door di cifranan presenta algun lunanan pasa y hasta pa medio di CAft mes, cu ta mustra cu pais Aruba ta den e margen di loke ta nan gastonan y entradanan. Tur esaki tambe nan a canalisa pa medio di un documento cu nan a entrega algun simannan pasa na oficina di representacion di gobierno di Reino na Aruba (VNO).

Aunke como Parlamento nan no ta reuni cu e politiconan Hulandes, nan a percura pa nan tin toch e rapport aki. Un aspecto cu a caracterisa e rapport cu nan a entrega na VNO tin di haci cu nan a enfoca specificamente riba e rol di gobierno di Reino. Nan no por keda sin para keto -el a bisa- riba e echo cu gobierno di Reino a haya e peticion di e colegio di supervision na 2015-2016-2017 pa interveni y evita pa pais Aruba ta den e situacion financiero actual. “Y gobierno di Reino a scoge pa no interveni… Kiermen gobierno di Reino a scoge pa no asumi nan responsabilidad di supervisor,” segun Parlamentario Tjon.

Aunke e ta consciente cu por ta e maneho cu gabinete Wever-Croes no ta esun mas popular, pero ta esun necesario y responsabel. Na bispo di e reunion di Conseho di Minister di Reino, Parlamentario Tjon ta haya cu esey Hulanda mester admiti tambe cu e situacion ta drechando y CAft mes a señala esaki.