Segun parlamentario Rocco Tjon: “Condicionnan no tin di haci cu e crisis cu nos ta aden actualmente”

Rocco Tjon, lider di fraccion di partido MEP, awe mainta a convoca un conferencia di prensa dilanti di VNO pa trece dilanti e condicionnan cu Hulanda ‘kier impone riba pais Aruba’. E condicionnan aki ta mara na sosten di likides mientras cu segun statuut, Hulanda mes tin deber di yuda Aruba.

Manera a keda conoci, dialuna ultimo Hulanda a manda 18 condicion pa prome minister Evelyn Wever-Croes, cu segun Tjon mes a sigura, “ta condicionnan mes cu no tin di haci cu e crisis cu nos ta aden actualmente”.

Ademas, el a señala cu e condicionnan aki ta bay toca e aparato hudicial y di enseñansa, y den nan concepto esey ta inaceptabel. No solamente pa motibo di e condicionnan, pero tambe cu den e pakete di informacion aki, Hulanda a bisa tambe cu no mag di comparti esaki ni cu gremio, ni cu politiconan, ni cu parlamento.

Di mesun manera, el a expresa cu e manera di procede di Hulanda tampoco ta aceptabel, pa motibo cu nan kier pa pais Aruba tambe bay di acuerdo cu dos cambio cu ta bay afecta e structura estatal. Hulanda kier pa Aruba bay di acuerdo sin cu por consulta cu gremio, parlamento of politiconan, cu di acuerdo loke el a sigura, minister presidente lo presenta mañan.

Den nan concepto, Tjon a menciona cu nan mester para keto na e momento pa wak pakico Hulanda kier bin cu esaki. “Si bo analisa argumentonan pa loke ta trata maneho financiero, nan no tin esey”, Tjon a declara.

Segun e tambe a sigura, Gabinete Wever-Croes desde 2017 a cumpli cu tur palabracion haci cu Hulanda, loke tin di haci cu finanzas publico y normanan financiero; pero tambe palabracionnan pa loke ta e normanan di gasto di personal.

“Argumentonan huridico tampoco nan no tin, pasobra Hulanda, a base di tratadonan y a base di statuut, tin un deber di yuda e paisnan na momento cu nan ta den crisis” Tjon a comenta.

Tambe a trece dilanti cu e derecho di un pueblo y e derecho di autodeterminacion ta esun di mas sagrado, y e entidad nobo cu Hulanda kier bin cune ta bay mina esaki. Ademas nan no por duna Gobierno di Aruba tur e informacion tres dia prome cu mester tuma e decision na Conseho di Minister y exigi di gobierno tambe cu ningun stakeholder mag di haya sa, pero nan ta exigi cu mester bay di acuerdo. “Si no nan ta bay laga literalmente e pueblo Arubano muri di hamber”, el a señala.

El a recorda cu nan ta bay atende e asunto aki internacionalmente na Nacionnan Uni, Union Europeo, Parlatino y tur otro instancia, pa denuncia e proceder aki di Hulanda.

Tjon como lider di fraccion di partido MEP a presenta pa un reunion cu e director di VNO, cu ta representante di Reino Hulandes na Aruba, “caminda nan a gaba e maneho cu Gabinete Wever-Croes ta hibando”, el a bisa. Ademas el a trece dilanti cu “si Hulanda no ta dicidi di brinda e sosten, e ta keda na cada ciudadano pa bin na VNO y busca su derecho”.