ORANJESTAD – Pa parlamentario di oposicion y ex minister di economia, Richard Arends no tabatin motibo cu pais Aruba a yega asina leu cu Union Europeo(UE)a pone nos den e lista preto bek, pa motibo cu un ley ‘relativamente simpel’ no a wordo trata na tempo.
Nan a ricibi te siman pasa den parlamento pa wordo trata. Pero pa falta di prioridad pa atende e ley aki a haci cu awor pais Aruba ta aparece bek den e lista negativo internacional di UE. Esaki debi cu no a entrega na tempo e cambionan haci den legislacion existente, specificamente di impuesto pa cumpli cu standard internacional.
“Esaki ta algo jammer pasobra e ta un ley tecnico”, el a bisa. Tambe e ta haya cu un ley asina no tin un peso politico cune. Pues e ta un ley relativamente simpel cu no tin un peso politico cune.
E ta considera cu na momento cu gobierno lo a pone e prioridad rekeri y aloca e capacidad humano limita cu tin pa atende cu e ley aki, esey no a pasa. Segun parlamentario Arends, mester haci uzo corectamente di e capacidad limita cu nos tin di huristanan pa atende cu legislacion. Pero e ta haya cu e prioridadnan a wordo poni pa ‘aumenta e impuestonan y esaki ta e resultado.’
Parlamentario Arends (AVP) a indica cu pa añanan Aruba ta conta cu un pool masha chikito di profesional cu ta traha ley, y di fiscalistanan. Pero si gobierno por a aloca tempo y capacidad humano pa atende cu e asunto aki, por a wordo evita cu pais Aruba su nomber a sali den luz negativo.
E ta haya cu e prioridad a wordo poni pa bin cu un reforma fiscal cu su prome fase no tabata nada mas cu un aumento di impuesto. E ta un refleho cu gobierno su prioridad no tabata pa cumpli cu palabracion cu nan mes a haci. Esta cu na luna di december 2018 lo bin cu e ley cu ta relata e cambionan specifico haci riba tereno di impuesto.
