Parlamentario Ricardo Croes a bisa cu un biaha mas su persona y su famia a bira victima di menasa di morto. Esaki a conduci cu diasabra ultimo e lider di fraccion di RED a haci un denuncia formal na seccion di recherche na Santa Cruz. El a agrega cu recherche ta na altura di tur e menasanan aki y tambe di tur e hendenan cu a haci e tipo di menasa aki tambe.
Ayera el a declara cu durante weekend ultimo via social media el a confronta e tipo di menasa aki. E ta haya ‘tristo’ di por scucha kico tur tin pensa di haci cu su mama, yiunan, caminda cu nan sa na unda su yiunan ta biba, y tambe cu nan sa unda e parlamentario ta biba.
Parlamentario Croes a declara cu e mester haci e denuncia aki como miembro di nos organo legislativo. Pero e mes ta haya e tipo di menasa aki hopi baho. “Sali ataca mi di un forma baho,” el a bisa.
El a laga sa cu e persona a presenta su mes como “ruman homber grandi e mucha homber cu a buta e cos ey riba Facebook di mi.” A base di pregunta formula pa Bon Dia Aruba, si tras di e menasa aki tin un sospechoso of nomber caba. “Sigur no! E persona a identifica su mes como ruman homber grandi di e mucha homber Figaroa cu a pone un post ariba Facebook. El a haci menasa cu su mesun homber,” el a bisa.
E parlamentario a agrega cu tur grabacion y tur nomber cu el a haci, el a haci’e su mes. E ta haya cu mirando e forma cu e menasa a wordo haci ta resulta mas facil pa haci e denuncia y identifica e persona cu a tribi di haci e menasa aki.
Sr. Croes a declara cu e ta e forma con politica ta wordo haci na Aruba, unda den su caso, nan a purba di atacha su integridad, pero menasa cu morto tambe. El a bisa cu esaki no ta e prome menasa den su direccion. Te hasta acto criminal cu por costa bida di nan ser keri a wordo realisa. Segun e parlamentario, el a yega di haya mas menasa caminda hende ta pasa grita pa e no cana su so, “pasobra mi dia ta bay yega.”
