Segun parlamentario Ricardo Croes: ‘No sa si caso di corupcion den gobernacion ta berdad’

Parlamento Ricardo Croes (RED) a bisa cu e no sa nada si tur asunto rond di kitamento di cartera ministerial di Sra. Marisol Lopez-Tromp tin di haci cu investigacion cu ta tumando luga relaciona cu casonan di corupcion. Actualmente ex-lider di POR ta bao investigacion relaciona cu e supuesto delito entre nan di corupcion den e asina yama caso Flamingo.

Den e programa ‘Den Combersacion cu Ricardo Croes’ cu a wordo transmiti dialuna atardi, e parlamentario a considera importante cu si esaki ta trata di caso di fraude, cualkier minister y ambtenaar cu ta topa cu algo asina, tin caminda pa cana, ya sea via Parlamento. Pero tambe tin caminda hudicial manera Procurador General, landsrecherche, etc.

Parlamentario Croes a laga sa cu e no ta na altura di caso di fraude, y si ta asina cu tin caso di e caliber aki, e ta desea di wordo informa. Specialmente si e casonan di fraude of corupcion aki de facto tuma luga. Esaki si Minister Presidente a wordo poni na haltura cu tin cosnan cu a wordo descubri cu no ta den su luga y cu mester a haci denuncia. “Pasobra mi no sa si esey ta berdad,” el a declara.

E ta haya cu si un persona ta keda keto den un caso asina di corupcion, e ta participa di e delito aki. Pero e no por bisa cu esey ta e caso: Ni cu minister a haya iregularidad, ni cu minister no a haci denuncia.

El a bisa cu e lider di POR, Andin Bikker su declaracion cu el a haci publicamente, ta e mesun declaracion cu el a haci na su persona. Mas di esey e no sa. P’esey parlamentario Croes ta reitera cu un comision di mediacion mester bay mas leu pa trece claridad rond di e caso di Sra. Lopez-Tromp su retiro.

Segun parlamentario Croes, nos ta den momentonan caotico den e pais aki. E ta haya cu tras di esaki tin intencion pa kibra e gobierno di coalicion aki (MEP-POR-RED). El a laga sa cu esun cu tin e intencion aki tambe tin un mal intencion cu pais Aruba. Y den esaki el a culpa oposicion y tambe un social media di noticia. El a bisa cu den e caso aki e ta para pa sirbi interes general, y interes general den e momento aki ta precario.