E topico di salud mental, specificamente prevencion di suicidio ta un tema cu ta forma parti di e obhetivonan principal cu parlamentario y lider di fraccion RAIZ, Misha Raymond, kier logra concretisa. Mirando e ultimo desaroyonan alarmante relaciona cu e tema aki, e parlamentario a manda peticion oficial pa presidente di Parlamento di Aruba pa un reunion publico cu e minister di Asuntonan Social, Rocco Tjon.

Den e carta, cu fecha 27 di augustus 2024, parlamentario Raymond ta pidi presidente di parlamento, Edgard Vrolijk, un reunion publico cu minister Tjon tocante e desaroyo di e plan di prevencion di suicidio, cu ta inclui den e mocion di fecha 11 di november 2022 cu e parlamentario a entrega, y tambe tocante e desaroyonan y politica relaciona cu prevencion di suicidio exitoso y intento di suicidio na Aruba.

Desde januari 2022 e parlamentario Raymond a cuminsa cu e caminda pa bin cu un plan di prevencion di suicidio. El a recorda cu riba 26 di januari 2022, el a haci un serie di pregunta na e minister encarga cu cuido di salud mental, minister Rocco Tjon, tocante su plannan di politica pa tuma medidanan contra e desaroyo preocupante di suicidionan y comportamento suicida na Aruba.

Riba 11 di november 2022, durante e tratamento di e presupuesto di pais Aruba pa aña 2023, Raymond a entrega un mocion, cu a keda aproba pa parlamento, cu cual el a haci un yamada na e minister pa elabora un plan di prevencion di suicidio cu ta contene diferente aspecto cardinal.

E aspectonan aki ta inclui campañanan di educacion publico, un hotline di 24 ora pa asistencia, disponibilidad continuo di cuido, profesionalnan cu experiencia, un enfoke multidisciplinario, eficiencia di costonan y coleccion di data relaciona cu e trabou realisa.

Parlamentario a indica cu riba 23 di januari 2023, el a manda otro serie di pregunta pa e mandatario, pidiendo claridad tocante e implementacion di e mocion cu ta enfatisa e elaboracion di un plan di prevencion di suicidio.

Den un carta cu fecha di 22 di mei 2023, minister Tjon a contesta e carta di parlamentario Raymond den cual el a indica cu varios iniciativa di politica a keda implementa, cu ta inclui atencion pa cuido mental den e proyecto di “Veilige Barios”, y cu a establece contacto cu varios organisacion, incluyendo Mind Us na Hulanda, pa yuda cu e implementacion di e mocion menciona.

Parlamentario Raymond a agrega cu e minister a indica tambe cu den e investigacion di STEPS di 2023, cu a wordo presenta dia 17 di mei 2024, un module tocante cuido mental a keda realisa. E parlamentario a indica cu durante e presentacion, e cifranan tocante suicidionan y comportacion suicida a wordo presenta y for di e cifranan sali na cla cu 3% di e populacion tabatin pensamento suicida den e aña anterior, pero solamente un mita di esnan cu tin e pensamentonan aki a busca ayudo.

Riba 2 di augustus 2023, Raymond a manda un carta di siguimento pa minister Tjon, puntrando si e ta di acuerdo cu su opinion cu e desaroyo preocupante di pensamento of comportacion suicida mester mas urgencia, y si e por a duna un idea di ki tempo e plan di prevencion di suicidio lo wordo presenta na parlamento.

Dia 4 di september 2023 e parlamentario a ricibi un contesta di e mandatario den cual el a responde cu varios di e iniciativanan cu a keda implementa a logra progreso, pero cu e creacion di un plan di prevencion di suicidio ta tuma tempo pa motibo cu no ta un tarea facil pa haci na un manera responsable.

E minister a menciona tambe den su respuesta cu e apoyo di Mind Us, e organisacion na Hulanda cu ta traha riba cuido di salud mental di hobennan na un manera multidisciplinario, lo continua den herfst di 2023, despues di un falta di empleado y a sigura cu e plan di prevencion di suicidio lo keda presenta na comienso di 2024.

Comienso di aña a pasa y riba 24 di juli 2024 Raymond a manda otro carta di siguimento pa e mandatario buscando claridad tocante ki tempo e plan di prevencion di suicidio lo keda presenta na Parlamento di Aruba. Te ainda e parlamentario ta wardando contesta for di minister Tjon riba e carta aki.

Den su ultimo carta, pidiendo reunion publico cu minister Tjon, parlamentario Raymond ta remarca cu for di e momento cu el a entrega e mocion dia 11 di november 2022, den cual a haci un yamada na e minister encarga cu cuido di salud mental pa presenta un plan di prevencion di suicidio na parlamento, lamentablemente un cantidad di suicidio y intento di suicidio a tuma luga.

“Tumando nota di e proceso aki cu a keda detaya mas ariba, mi ta nota un falta di urgencia y prioridad pa e bienestar di e ciudadanonan den cuido di salud mental, particularmente den e caso di prevencion di suicidio. E mocion cu a haci un yamada na e minister pa presenta un plan di prevencion di suicidio data di 11 di november 2022. E prevencion di suicidionan merece y ta exigi urgencia y prioridad,” parlamentario Raymond a enfatisa.

Pa e motibo aki e parlamentario a entrega un peticion oficial, cual tambe wordo firma pa colega di fraccion Raymond Kamperveen y parlamentario y lider di fraccion ACCION 21, Miguel Mansur, na presidente di parlamento pidiendo un reunion publico cu minister di Husticia y Asunto Social, Rocco Tjon.

Den un entrevista anterior cu Bon Dia Aruba e parlamentario a enfatisa cu esaki prevencion di suicidio ta un tema cu e ta bay keda pusha pa bay dilanti y ta algo cu e keri wak wordo realisa.

E parlamentario a subraya cu tin un tabu tocante suicidio of tin un tabu tocante comportacion suicida cu hopi no ta compronde, pero tabu no ta nifica cu no mester duna informacion of splicacion. P’esey un di e aspectonan cardinal di e mocion cu el a presenta pa no bin solamente cu un liña di 24 ora pa hende yama, pero pa bon tambe cu campañanan di educacion pa comunidad ta informa.