Ayera mainta parlamentario y lider di fraccion PPA Otmar Oduber a tene un conferencia di prensa durante cual e la toca diferente punto, entre nan e amienda presenta pa fraccion AVP y Futuro pa presupuesto nacional pa aña 2025.

Oduber a indica cu riba su mes, e amienda ta un bon accion y ta aplaudi e iniciativa aki, y mas ainda mirando e contenido di e amienda aki, cual el a remarca, ta exactamente loke fraccion di PPA si a papia riba dje durante temporada di campaña. .

El a splica cu partido PPA a inclui den nan programa di partido cu nan kier mira recorte den gastonan di gobierno, cual ta inclui den amienda pero ta solamente 10% pa unicamente goederen en diensten, e funcionamento di e departamento- y instancianan den gobierno.

“Nos a bisa bo mester tin e curashi como un gobierno nobo, y nos no lo vota na fabor di ningun presupuesto cu no ta indica cu di berdad ta corta den e vet cu tin den gobierno di Aruba. den su presupuesto nacional. No 10% den goederen en diensten si no 10% riba e presupuesto total di pais Aruba,” el a bisa.

Oduber a splica cu tin un cantidad di departamento cu simplemente no ta pertenece na trabounan gubernamental mas y cu tin mas cu 30 edificio para rond Aruba caminda ta huur 48 otro edificio, cu ta resulta den gastonan astronomico pa gobierno, y no ta inverti pa drecha e edificionan para. .

El a señala cu el a mira cu den e amienda a inclui parti di loke fraccion PPA a propone pa loke ta trata legalisacion di indocumentadonan cu ta trahando na Aruba. El a sigui splica cu partido PPA a bisa durante campaña cu mester legalisa por lo menos 10 mil indocumentado cu tin na e pais. Segun calculacion di instancianan tin entre 12 cu 15 mil persona indocumenta cu ta trahando, cu tin un empleo y tin un entrada, pero cu no ta contribui na economia di Aruba.

El a indica cu den e tratamento di presupuesto, unabes cu e continua, fraccion PPA lo bin cu mocionnan tambe pa continua cu e plan cu e partido tabatin cu ta bisa cu si legalisa esnan cu ta trahando caba, lo trece entrada extra pa Aruba.

E parlamentario a menciona cu cu cada cinco mil indocumentado cu ta traha pais Aruba ta perde 25 miyon florin pa aña y si legalisa 10 mil di nan, ta papiando di 50 miyon florin adicional den caha di gobierno, directo di hende cu ta trahando caba.

El a agrega cu lamentablemente den e beleidsinstructie cu a ser entrega na DIMAS, ta papia unicamente di e sector horeca. Esaki ta un punto, el a señala, cu fraccion PPA lo bin back riba dje den tratamento di presupuesto ya cu e ta di opinion cu mester ta habri pa tur indocumentado cu ta trahando pa un periodo caba, cu ta dispuesto pa pasa e proceso completo, y cu e doño di trabou kier firma p’e, pa cuminsa legalisa e personanan aki.

“No ta husto pa resto di comunidad, cu nan ta bira malo, nan ta usa remedi di esnan cu si ta inscribi na AZV. No ta husto cu e hendenan aki, cu hopi di nan a haya yiu na Aruba y nan yiu ta bayendo scol, y esnan cu ta paga impuesto ta paga pa nan pasobra tin un ley cu ta obliga nan manda e muchanan scol,” el a expresa.

Oduber a indica cu AVP y Futuro a scucha di partido PPA y a inclui esaki den e amienda, pa legalisa e indocumentadonan pa duna un oportunidad husto na economia di pais Aruba.

Sinembargo, el a agrega, ni Futuro ni AVP ta sincero cu e comunidad y a bisa cu e partidonan aki ta “burlando di e inteligencia di comunidad di Aruba y esey ta loke nos ta lamenta.”

El a splica cu a spera cu partido Futuro, cu a bisa cu lo tin un otro tipo di politica y cu lo actua corecto, a tuma un amienda riba e prome dia di tratamento di presupuesto, pero no a tuma amienda di e resto di fraccionnan cu ta den parlamento

“Bo kier hunga un wega politico, kier haci show politico pasobra bo ta formando gobierno y ta interumpi tratamento di un presupuesto, cual ta ilegal den e caso aki. E presidente di parlamento si e tabata sincero, si di berdad Futuro cu e ta representa como presidente di parlamento kier tabatin un politica diferente, lo mester a scucha di e otro fraccionnan si tin mas amienda ta bay drenta pa ser manda Raad van Advies, pa tur ser manda hunto, pa por trata esakinan,” el a remarca.

El cuestiona si na momento cu continua cu e amienda, e lo desea di wak si fraccion PPA of MEP entrega amienda, si e presidente di parlamento lo suspende e reunion publico atrobe pa manda e amienda Raad van Advies pa haya conseho manera cu e ley ta exigi. “E ora nos no ta yega na 31 di maart y e ora nos tur sa kico ta sucede, Hulanda lo tuma su pasonan,” el a menciona.

“Bo ta abusa, mi tin cu bis’e manera cu e ta, como presidente di parlamento, como Futuro cu a priminti un politica nobo, bo ta usa atrobe inteligencia di e comunidad aki, bo ta mal usa inteligencia di e comunidad aki, bo ta core entrega un amienda, core mand’e Raad van Advies pa e bin back pa trata e presupuesto, pero bo ta lubida cu democracia ta exigi pa e otro fraccion tambe entrega nan amienda,” el a agrega.

Oduber a menciona tambe cu e amienda aki ta gaña comunidad ya cu tres luna pasa ainda AVP tabata insisti cu den 100 dia ta aumenta e placa pa pensionado cu 700 florin, pero den e amienda ta papia di un aumento di 250 florin, y no di 700.

E parlamentario a indica cu na momento cu Raad van Advies entrega su conseho, fraccion PPA lo pone su posicion cla pa dilanti pa loke ta trata e presupuesto aki. “Un cos bo no ta bay haya di fraccion di PPA, bo no ta bay haya nos ta hunga cu inteligencia di pueblo, bo no ta bay haya nos ta gaña of cambia loke nos a bisa den eleccion tres luna pasa cu nos ta para pe y cu lo haci pa e comunidad aki pasobra simplemente e tipo di politica ey di manipula comunidad, di manipula pensionadonan y di manipula henter un pueblo mester pasa pa pasado. Nos ta lamenta cu un partido cu a haya sosten como partido nobo, den e caso aki partido Futuro, ta contribui of ta participa na e tipo di politica aki simplemente pa forma proximo gobierno,” el a subraya.