Segun parlamentario Otmar Oduber, Ley Electoral actual ta anticua y discriminatorio

Diahuebs mainta durante un conferencia di prensa parlamentario y lider di fraccion PPA den Parlamento di Aruba, Otmar Oduber, a toca entre otro e topico di Ley Electoral di Aruba y e necesidad pa cambia esaki pa un Ley Electoral mas moderno y husto.

Oduber a indica cu relaciona cu e eleccion parlamentario cu a tuma luga aña pasa a reuni na varios ocasion cu Censo y tambe Conseho Electoral di Aruba durante cual a constata cu hopi cos no ta bon. El indica cu hopi biaha a ser bisa cu ta ser constata cu cosnan no ta bon durante eleccion, pero despues ta lubida riba dje y ta mira loke a tuma luga den e ultimo eleccion cu yegando un proximo eleccion den parlamento ta purba ta trece cambio

“E kiesverordening ta bieu. Nos kiesverordening no ta refleha loke pueblo aki ta desea. E kiesverordening aki ta discriminatorio. E no ta permiti ora un gobierno cay cu cualkier partido nobo por lanta y inscribi su mes. E ta prohibie den e caso ki. E ta discriminatorio pa cualkier organisacion cu kier lanta,” el a remarca.

El a splica cu e kiesverordening aki ta haci cu partidonan cu a yega te na dos mil y pico voto, faltando algun shen voto pa yega na un asiento, ta ser saca completamente di e resultado electoral.

El a sigui splica cu e Ley Electoral ta haci posibel cu na momento di firma, e partidonan grandi ta firma pa e chikitonan y como resultado tin 10, 11 of 12 partido ta participa den eleccion. Na final di dia esaki ta pone cu tin cantidad di restzetel cu den mayoria di biaha door di e calculacion cu tin den ley na e momentonan aki ta haci cu e partidonan grandi ta haya e restzetel.

Parlamentario Oduber a indica tambe cu si un miembro di parlamento ta esun cu mester haya mas tanto voto si of no, un discusion cu tin añas caba andando. El a subraya cu partido PPA a señala e hecho cu nan si ta kere den un proceso caminda cu e candidato cu ta postula su mes cu ta haya mas voto ta e candidato cu tin cu representa e votonan ey den Parlamento di Aruba, algo cu e Ley Electoral actual no ta permiti.

“E momento pa papia riba nos kiesverordening ta awo despues di un eleccion y no lag’e muri atrobe cu despues nada no ta pasa cune,” el a resalta.

El a splica cu e motibo cu ta asina importante pa papia tocante e Ley Electoral awe ta pasobra aworaki e proceso di formacion di gobierno ta andando. El a señala cu e posibel gobierno, pa loke ta trata e formadornan cu a ser nombra, e dos partidonan cu a wordo nombra, ora haci un calculacion e voto di e dos partidonan aki hunto ta representa 45% di e electorado di Aruba.

Oduber a enfatisa cu ta bay tin un gobierno, den caso cu e dos partidonan aki forma, cu no ta representa un mayoria di e comunidad. El a menciona cu 25,226 hende a vota pa e dos partidonan aki siendo cu 69,824 tabatin derecho di voto y 55,496 a eherce su derecho di voto, sacando e votonan no valido afo.

“Un gobierno cu posiblemente ta bay sinta cu 55% di comunidad no a vota ni sostene e gobierno aki, un gobierno di minoria. Pa motibo di e sistema di restzetel cu nos tin na Aruba,” el a indica.

El a splica cu si tuma e mesun filosofia pakico por ehempel partidonan manera ACCION21 y RAIZ, cu tabata falta algun shen voto pa yega na e 2,642 pa logra un asiento, esey ta nifica cu partido AVP cu awe tin nuebe asiento cu un kiesdeler di 2,642 lo mester a genera 23,798 voto pa yega na nuebe asiento, siendo cu nan a haya unicamente 17,877 voto. Un diferente di casi seis mil voto, usando e mesun filosofia cu ta usa pa un partido por logra un asiento completo.

Parito MEP a haya ocho asiento y cu e mesun kiesdeler di 2,642 ta nifica cu pa partido MEP por a haya su ocho asientonan, usando e mesun principio pakico a laga e otro partidonan afo, mester a genera 21.136 voto pa haya ocho asiento , sinembargo nan a genera 17,571 voto.

Oduber a remarca ya no ta trata di un discusion si ta partido chikito of partido grandi, pero mas bien e ta bay pa e filosofia y e hecho cu el a trece dilanti na e momentonan aki caminda cu ta bay tin pa prome biaha, si no ta unico biaha, un gobierno di minoria.

“No a wak esaki den pasado, den historia di pais Aruba. Mi ta spera cu naturalmente, y p’esey nos ta boga pa un base mas amplio cu ta posibel den gobernacion, na cierto momento ta toca turno na e cuater partidonan cu tey pa forma un base mas amplio cu ta posibel den e gobernacion nos dilanti,” el a bisa.

E parlamentario a remarca cu definitivamente e sistema di votacion, e kiesverordening ta mustra cu e eleccion aki, ora cu haci un analisis, cu ta bay tin un gobierno y tin un parlamento cu no ta conforme e boluntad di e pueblo di Aruba.

El a subraya cu ta imposibel cu ta laga afo, den e caso aki mas di 30 mil voto cu no a vota pa gobierno y si coy e partidonan cu no a drenta parlamento ta papiando di casi 18 mil voto cu no a haya un voz den parlamento di Aruba.

“Algo ta fundamentalmente robes cu e sistema democratico aki na Aruba. E ley a wordo traha na aña 87 cu e pensamento cu lo funciona manera e ta funciona na Hulanda, pero e no ta funcionando den un comunidad chikito manera Aruba. Bo ta bay haya un gobierno di 12 asiento caminda cu cuater di e asientonan aki ta asientonan cu no ta wordo yena cu e boluntad di e pueblo di Aruba si no pa e sistema di un kiesverordening cu ta anticua y cu ta duna pa prome biaha Aruba un gobierno di minoria,” el a indica.

Parlamentario Oduber a trece dilanti tambe cu den eleccion pasa a purba di tin un control pa loke ta e aspecto financiero di e partidonan. El a splica cu como partido nan a tuma nota di cambionan cu mester ser haci den un sistema cu no ta surtiendo y no ta cumpliendo cu su proposito.

El a señala cu ora mira loke a ser publica pa cada partido pa loke ta nan financiamento y gastonan cu nan tabatin, por deduci cu e sistema aki ta totalmente impugna y no ta cumpli cu e spirito pa cual e ley aki a ser lanta.

“Ta yega momento pa nos sinta hunto y haci e cambionan necesario. No solamente papia riba nan pero haci e cambionan necesario pa nos por garantisa e sistema electoral cu nos pueblo en berdad ta haya un gobierno cu e merece,” el a enfatisa.