ORANJESTAD – Parlamentario di fraccion AVP, Mervin Wyatt-Ras a cuestiona e echo cu miembro di parlamento ta tuma e rol di coordinador di gobierno. El a bin cu e cuestionamento aki riba e prome reportahe encuanto ehecucion di e Crisisplan Social, cu minister Glenbert Croes a presenta dilanti parlamento diabierna ultimo.
Wyatt-Ras ta referi na su colega parlamentario, Sue-Ann Ras (MEP). E ta haya cu si mañan e parlamentario ta laga cos pasa, parlamento tin cu bay cuestiona e parlamentario aki. “Como parlamentario bo no por ta parti di gobierno,” el a bisa.
Wyatt-Ras a laga sa cu control mester tuma luga pa ehecuta e Crisisplan Social, pero locual el a vocifera ta cu e control mester tuma luga door di parlamento. Y no un miembro di parlamento mester asumi e rol di gobierno.
A pesar cu e ta haya cu Ras ta hopi activo, y cu e kier sa kico ta pasando den Departamento di Asunto Social, como parlamentario e no ta haya cu esaki ta un problema. Wyatt-Ras ta haya cu e problema ta sinta na momento cu Sra. Sue-Ann Ras ta representa parlamento. Si asina e ta, esaki mester wordo papia cu tur fraccion.
“No ta posibel cu bo ta representa nos eynan”, asina e miembro di fraccion di AVP a bisa.
E ta haya cu un decision asina ta haci nan rol como parlamentario mas debil. E ta indica cu ta facil pa minister tira tur responsabilidad riba e miembro di parlamento aki, ya cu e ta bira un sorto di coordinador di e minister aki. E no ta kere cu esaki ta e forma corecto. “Nos mester anda corecto den parlamento principalmente!” el a declara.
E ta haya cu ta existi un comision cu ta controla parti di e instancianan social. Considerando cu Wyatt-Ras ta bin for di e sector social, el a indica cu e sa cual ta su rol actualmente como parlamentario pa controla gobierno y e instancianan di e aparato gubernamental. Pues e ta haya cu nan rol como parlamentario ta pa wak si gobierno a duna placa y si a haci su trabou. Principalmente, ora cu nan ta papiando di un suma caminda e minister di asunto social mester ta responsabel di dje.
