Segun Parlamentario Marvin Wyatt-Ras: Parlamentario Luigi Bergen mester para responsabel pa su acto

Parlamentario di oposicion, Marvin Wyatt-Ras a referi na e acusacion cu a wordo haci contra un miembro di nos organo legislativo, den e caso aki Parlamentario Luigi Bergen, como sospechoso di violencia domestico.

E caso penal a wordo entabla contra Bergen, kende ta wordo sospecha di maltrata su yiu muhe, locual ta haci cu e mester presenta den Ministerio Publico otro siman pa un officierszitting.

Wyatt-Ras a referi na e caso aki di Bergen, principalmente cu su colega di fraccion Benny Servinger a wordo nenga durante un reunion di comision central – pidi pa e fraccion di MEP – pa e no bay Parlartino pa representa Parlamento, ya cu e ta bou investigacion den e caso Avestruz. Pero tambe nan ta cuestiona integridad di Parlamentario Daphne Lejuez, kende a dicidi di bandona e fraccion di MEP pa bira independiente.

Sinembargo Wyatt-Ras a bisa cu meymey di e fraccion di MEP ‘tin persona cu ta wordo cuestiona pa nan integridad’. El a referi na un proces-verbaal di 9 di juli ultimo cu ex señora di Bergen a haci denuncia cerca polis contra dje, ya cu e ta maltrata su yiu muhe. Pa sostene su denuncia, Wyatt-Ras a indica cu nan tin entre otro, carta di dokter unda ta mustra cu for di 2012 tabatin maltrato di ‘yiu muhe di Luigi Bergen.’ Den e carta aki ta reporta multiple hematoma.

Tambe e parlamentario a bisa cu e hoben aki, yiu di e parlamentario en cuestion, a pidi ayudo profesional, caminda mester extende esaki pa motibo cu e ta sufri di sindrome di multiple ventilatie a base di e trauma ocasiona pa e maltrato ocasiona pa su tata,’cu a purba di choke y dal’e den muraya,’ asina Wyatt-Ras a declara dilanti di Parlamento. Te hasta den e caso aki a wordo involucra fundacion Sostene Mi pa duna guia.

Relaciona cu e caso di Bergen cu mester presenta dilanti fiscal diamars proximo pa un ‘officierszitting,’ manera a keda divulga den e website di noticia 24ora, Wyatt-Ras a indica cu tur e documentacion traha pa dokter y profesional ta evidencia cu tin ‘un caso y tin maltrato di su yiu.’ E hecho aki no ta uno singular, pero e ta haya cu den e caso specifico di Bergen, e tin cu carga responsabilidad pa e acto aki.