Falta apenas seis luna pa Aruba su pueblo participa den un otro eleccion general, y te ainda nos no a tende practicamente nada relaciona cu e Conseho Supremo Electoral su tarea importante como maximo autoridad electoral.

Parlamentario Marlon Sneek, kende como politico y tambe como lider di e fraccion di partido cu a logra mas voto den eleccion ultimo (AVP), a trece na Bon Dia Aruba su ponencia cu tur respet rond di e topico aki. Ya cu practicamente cada pasa 4 aña Conseho Supremo Electoral ta bin hunto. E no ta manera otro paisnan cu ta un organo plenamente estableci y institucionalisa y cu ta draai tur aña.

E ta haya cu e organisacion aki no ta buta riba pia manera mester ta, y no tin su leynan tampoco pa e por bira totalmente un organisacion oficial independiente. El a trece como ehempel Corsou cu aña pasa a yega di pasa e ley di conseho electoral oficialmente, manera mester ta.

Mientras cu na Aruba ta miembronan nombra cu tres luna prome cu eleccion nan ta bin hunto pa cuminsa organisa un eleccion. Y na final ta e mesun trahadonan di censo cu ta esunnan cu mester haci tur trabao. Mientras cu cada un di e persona cu ta parti di e organisacion ey tin otro tareanan pa haci.

Sr. Sneek a declara na e matutino aki cu te ainda nan no a haya niun confirmacion oficial riba e miembronan di e conseho electoral presidi pa Sr. Glenn Thodé kende actualmente no ta estableci na Aruba. E parlamentario no ta haya straño cu eventualmente tres luna prome cu eleccion, Sr. Thodé ta bin for di Hulanda pa asumi su rol bek. Igualmente e ta haya cu por ta lo wordo haci apelacion na Sr. Hubert Maduro pa e bay atende un eleccion mas den su funcion como vice presidente di e Conseho Supremo Electoral.

Sr. Sneek ta haya cu esey ta e discusion riba con serio bo ta tuma un responsabilidad asina. “Si na e momento cu abo mes ta scoge pa bo ta biba pafo di Aruba y haci trabao pafo di Aruba,” el a declara. Den e caso aki e ta haya cu ta elegante pa e mesun presidente di e Conseho Supremo Electoral tuma honor di su mesun funcion den caso cu e no por sigui fungi den e posicion aki manera mester ta. Kiermen pa Sr. Thodé pone su funcion na disposicion y laga otro hende haci e trabao, si e no ta dispuesto pa haci’e mas.

“E no ta djis pa bo sinta riba un stoel y bisa den bo carta di credencial cu bo tabata presidente den e caso aki di Conseho Supremo Electoral…,” Sr. Sneek a declara na e matutino aki. E ta haya cu e trabao aki ta demanda pa un persona den e funcion aki presenta por ehempel un rapport di kico e conseho electoral a produci, mientras cu Sr. Thodé tabata como presidente.

El a agrega cu mirando cu eleccion ta na caminda, nos no a mira niun rapport of analisis kico nos mester tene na cuenta cune. Tambe ta importante pa cuminsa informa e hendenan ken tin derecho y tambe pa cuminsa traha riba nos cedula, etc.

Sr. Sneek ta haya cu esaki ta un trabao di Conseho Supremo Electoral, pero actualmente e ta mira cu e ta keda algo di un cos di cada cuater aña di core sak’e for di cashi, y no ta wordo duna e contenido real cu e organo aki mester tin.