E siman aki Parlamento a haya un agenda pisa. Ayera nan mester atende cu e ley polemico di Serlimar; y awe gobierno mester rindi cuenta dilanti nos organo legislativo riba nan decision di no ratifica e ley di supervision financiero (LAft) cu Parlamento a yega di aproba.
Segun lider di fraccion di AVP, Parlamentario Marlon Sneek, awe nan ta bay mira kico ta e historia cu e prome mandatario ta bay conta den e reunion publico riba e echo cu gobierno no a ratifica e ley di LAft cu e cambionan cu Parlamento a aproba. E ta un ley cu fraccion di AVP a vota contra, pero cu mayoria di Parlamento a vota p’e. Sneek ta haya inconstitucional cu e ley aki no a wordo ratifica, ya cu e ta e deseo di pueblo representa den nos organo legislativo.
Gobierno a abstene di firma e ley aki cu e cambionan cu Parlamento (fraccion di MEP) a introduci den dje, despues cu Conseho di Minister di Reino (Hulanda) tabata contra di e cambionan aki, ya cu -segun Hulanda- no ta ahusta na e protocol cu nan a firma cu gobierno di Aruba. Ademas nan ta haya cu ta mengua a tarea di supervision financiero di CAft.
E echo aki a trece cune cu pais Aruba ta na porta di haya un ‘aawijzing’ (instruccion) di Reino, debi cu no a hinca den un ley, e protocol cu a firma luna di november 2018 cu mester bay den legislacion di Aruba sin niun cambio, prome cu fin di 2018. E protocol tin e normanan presupuestario 2019-2021.
Tocante e reunion publico di awe, Sneek a bisa cu gobierno mester para responsabel, ya cu e ta un protocol cu gobierno mes a firma. “Y si bo ta responsabel, bo ta asumi bo responsabilidad y bo ta cumpli cu e protocol aki,” segun e Parlamentario menciona.
El a indica cu un di e puntonan di discusion den e protocol ta cu gobierno a bay di acuerdo pa reestablece e ley di LAft cu normanan nobo. Pero ora cu gobierno a bay Parlamento cu e ley aki, e fraccionnan di coalicion den Parlamento a dicidi di cambia e ley ‘integralmente’ pa medio di amienda.
E ta recorda cu na e ocasion ey, nan a yega puntra Prome Minister riba e amienda cu e fraccion di coalicion a aproba, y e contesta di e mandatario tabata: “Nos kier a haci hopi mas cambio, pero ta tempo nos no tabatin.” Te hasta Premier Wever-Croes a expresa cu gobierno ta aproba e cambionan cu Parlamento a bin cune, y cu nan tabata para shen porciento su tras. Pues den poco palabra e prome mandatario a bisa cu e no ta para tras di e protocol, segun Sneek.
Sneek a agrega cu awor ta resulta cu gobierno ta bisa cu Hulanda ta bin cu presion riba nan. Mientras gobierno mes a bay di acuerdo cu e protocol dia 22 di november 2018, pero despues no a cumpli cune. Pero tambe gobierno a yega di ‘aplaudi’ e cambionan cu Parlamento a bin cune.
Pa conclui, e ta haya cu awe Prome Minister, kende a firma e protocol, ta esun cu mester bay convence su Parlamentarionan di coalicion cu gobierno mester cumpli cu e protocol cu e mes a firma.
