Manera ta conoci caba algun miembro di parlamento a sali dilanti pa expresa cu nan no ta di acuerdo cu e cambio di maneho cu minister di Transporte Ursell Arends kier introduci pa loke ta trata traspaso di permiso di taxi y e aumento den e cantidad di asiento pa transporta pasahero. Parlamentario y lider di fraccion ACCION21 Miguel Mansur a splica na Bon Dia Aruba kico ta su punto di bista tocante e situacion aki.

Parlamentario Mansur a indica cu lider di fraccion MEP, Sr. Hendrik Tevreden a pidi un reunion entre e Comision di Transporte di Parlamento y e taxistanan. E comision ta bay reuni diahuebs mainta cu minister Arends riba e mesun topico.

El a remarca cu aunke e no ta miembro di dicho comision e ta atende e reunion pa scucha tur dos banda di medaya. El a splica cu su punto di bista pa loke ta trata e situacion cu e taxistanan y minister Arends ta cu na prome luga e MB di minister Arends legalmente no por contradeci e landsverordening existente.

“Mi no ta full di acuerdo cu taxista ni minister, mi ta kere mester bin cambio pero e cambionan mester inclui e taxistanan. Como parlamentario mi deber ta pone e interes nacional prome y con nos transporte ta organisa actualmente no ta den interes di pueblo ni nos bishitante. Mester yega na un acuerdo cu taxista cu un periodo di transicion pa modernisa nos sistema di transporte y haci’e mas accesibel,” Mansur a destaca.

El a splica cu ACCION 21 su proposicion ta pa cambia cada permiso di taxi den cinco permiso pa “ride-share” cu ta keda propiedad di e taxistanan actual. Asina cada taxista por busca cuater chauffeur adicional pa core pa nan a cambio di habri mercado pa “ride-share” apps manera uber.

E proposicion ta inclui cu exclusividad di e permiso aki lo dura pa cinco aña y despues ta habri mercado pa competencia. Esaki, el a resalta, lo crea un periodo di transicion den cual taxista por prepara financieramente pa cambio den mercado.

Pa loke ta e punto si parlamento por exigi minister Arends pa revoca e MBnan, e parlamentario a indica cu den un reunion publico, cu por ser pidi pa tres parlamentario, mayoria por pasa un mocion cu ta pidi minister revoca su MBnan.

El a remarca cu tur minister ta goberna cu sosten di parlamento y un minister cu no cumpli cu deseo di parlamento ta core e riesgo cu parlamento lo pasa un mocion di desconfiansa contra dje y mand’e cas.

“MEP cu AVP tin 14 asiento entre nan dus facilmente e dos partidonan por pidi un reunion publico y den e reunion pasa un mocion cu ta pidi Minister Arends trek-in su MB nan y si e no cumpli cu deseo di parlamento nan lo considera retira confiansa den su persona,” el a subraya.