Durante su prome conferencia di prensa como Parlamentario, Luigi Bergen a nenga cualkier acusacion contra su persona. Parlamentario Bergen a premira caba cu na momento cu e huramenta pa bira miembro di nos organo legislativo, lo bin atake ‘hopi baho y vil’ contra su persona.
Ayera mainta durante un conferencia di prensa na Cede di MEP, el a exhibi un copia di un carta cu el a entrega na Parlamento pa loke ta trata su funcion cerca e carteranan cu ta resorta bou e Minister Chris Romero; y tambe su carta di retiro. “Pasobra mi no kier bira un di dos Richard Arends,” el a declara. Tambe el a pidi un declaracion di Ministerio Publico cu fecha 5 di september, unda ta para cu no tin niun acusacion of impedimento contra su persona pa bira miembro di Parlamento.
Tambe el a trece su banda di medaya tocante e informacion cu a circula cu ta indica cu su persona a wordo suspendi pa Minister Romero debi na un incidente personal. Parlamentario Bergen a bisa cu e kier aclaria cu ora nos a drenta luna di juli tabatin periodo di vakantie. Pero tambe un periodo cu den su bida priva a cuminsa un proceso di separacion cu a conduci na su divorcio. Sinembargo un website a informa cu el a wordo suspendi hunto cu otro miembro femenino cu tabata traha den e despacho di Minister Romero. Parlamentario Bergen a cualifica esaki como: ‘netamente gañamento.’
El a splica cu un suspension di un ambtenaar ta un straf disciplinario, caminda e mester tin un trayecto pa cana. P’esey e ta bisa cu nada di loke a wordo bisa no ta cuadra cu realidad. Segun e miembro nobo di e fraccion di MEP, Luigi Bergen, e temporada ey el a baha cu vakantie y pareu cu esaki a surgi e echo cu ex Parlamentario Sue Ann Ras a dicidi di baha como miembro di Parlamento. E net riba e lista conforme e ley tabata su persona, el a bisa.
Parlamentario Bergen a sigui insisti cu nada di loke a wordo divulga via un website di noticia ta cuadra cu realidad.
