Evaluando e contenido di e manifiesto cu a wordo entrega na final di e marcha organisa pa partido di oposicion (AVP), parlamentario Hendrick Tevreden (MEP), ta haya straño cu nan ta exigi pa cumpli cu bahamento di edad di pensioen, mientras nan mes a aumenta edad di pensioen.
E ta kere cu e tema di edad di pensioen ta un di e puntonan cu sigur partido MEP por cumpli cu nan.
Encuanto e promesa cu a wordo haci durante eleccion ultimo, y e falta di cumplimento di algun di nan di parti di gobierno (MEP-POR-RED), parlamentario Tevreden a indica cu tur locual MEP a presenta den e plan di gobernacion ‘nos por substancia esaki y bisa con nos lo por logr’e’.
E ta admiti cu berdad nan a priminti di goberna sin medida, pero e punto di salida tabata cu gobierno lo conoce un surplus ora nan a drenta gobernacion. Sinembargo esaki no tabata e caso, el a laga sa. Mas bien nan a haya un deficit di alrededor di 130 miyon florin.
E ta haya cu como gobierno cu a drenta nobo, nan a bin confronta un estado di 130 miyon di deficit. Solamente den proyecto manera Green Corridor, Watty Vos Boulevard tin alrededor di 80.9 miyon, cu mester wordo paga y cu e gobierno anterior nunca a presupuesta. Pues el a agrega cu nan gobierno no tabata premira un deficit, y un debe asina, ya cu gobierno anterior a proclama cu tur cos tabata den ordo. Esaki a demanda cu nan mester bin cu e pasonan of medidanan cu a wordo tuma.
Pa e miembro di Parlamento, e asunto di cumplimento of no di loke nan a priminti den eleccion, por bira un discusion cu nan por tin riba dje. E no ta haya algo malo pa debati riba e puntonan ey.
