ORANJESTAD – Parlamentario Hendrick Tevreden (MEP), kende den pasado a yega di lidera un manifestacion tempo cu su partido tabata den oposicion contra gabinete Mike Eman, a cualifica e marcha di diabierna ultimo como uno pacifico.
El a bisa cu e marcha aki no tabatin niun alteracion di orden publico. Igualmente el a laga sa cu un marcha asina ta algo democratico y den un bon forma. Sinembargo e tin cu bisa cu na su opinion, dia 12 di april ultimo of sea dia cu e marcha a tuma luga, Aruba a rechasa e liderazgo ‘manipulativo y di division.’ E ta kere cu Aruba ta den un bon caminda cu ideologia y pensamento cu nos mester ta democratico, pero tambe nos mester tin respet pa otro.
Tevreden a indica cu manera nan a yega di categorisa e marcha aki como uno cu no tabata hustifica y cu no tabatin un causa specifico. Pero e ta reitera cu e organisadonan di e marcha aki a scoge pa manipula y purba di dividi nos pueblo.
“E resultado a duna nos un satisfaccion pa sa cu pueblo ta mas consciente. Pueblo lo marcha pero pa un causa husto,” el a laga sa.
Tevreden a agrega cu Aruba ta scoge pa un nivel di politica diferente y nan como parlamentario ta determina pa pone esaki den practica. Pero mas ainda pa nos por biba pa medio di locual nos ta vocifera.
E kier enfatisa no solamente na esunnan cu a organisa e marcha di diabierna ultimo, pero tur lider di nos comunidad, pa percura cu ora bo ta lidera, semper tin den mente pa yuda otro pa ta mas miho cu bo. Tambe pa bo pone un direccion concreto y un vision cu hende por carga. Pero tambe cu bo por crea algo miho pa e comunidad aki.
