Parlamento a haya chens pa papia cu Sr. Christian Olsen kende ta consul for Political and Economic Affairs di Merca, asina parlamentario Endy Croes a informa.

E parlamentario aki hunto cu su colega Rocco Tjon a reuni cu Sr. Olsen, caminda den nomber di nan fraccion a tene un combersacion bastante largo y amplio cu e diplomatico aki.

Parlamentario Croes a bisa cu den e reunion aki nan no a touch cu e tema di Centers for Disease Control and Prevention (CDC) pa kita Aruba for di e clasificacion di halto riesgo di Covid. Tampoco nan no a papia riba importacion of exportacion di cannabis medicinal. Nan mision cerca e diplomatico tabata riba aspecto economico so, ya cu tabatin otro consul cu a bini den e mesun delegacion. Tambe nan a yega di reuni cu gobierno unda Minister Presidente y Minister di Turismo a atende e asunto di CDC.

Mientras cu nan mision como miembro di Parlamento tabata pa enfoca riba economia y proyectonan nobo cu por para banda di turismo. “Nos ta buscando otro pilarnan cu nos por bisa, tin un pilar number dos y tres den futuro,” el a declara.

E no ta descarta cu por ta un di e pilarnan aki lo por bira un pilar number uno den futuro. Bon Dia Aruba a puntr’e si esaki ta inclui cannabis medicinal. Parlamentario Croes a bisa cu topico aki no a ser trata. Pero e ta haya un poco prematuro pa e bay den detaye riba na combersacion cu e consul Olsen.

Parlamentario Croes a bisa cu nan a sali hopi contento cu “noticianan hopi alentador cu mi no por comparti den detaye aworaki ainda.” Sinembargo den transcurso di e luna aki y na su debido tempo, e parlamentario encuestion a priminti cu lo comparti tur e informacion tocante e reunion aki.

Pero si el a laga sa cu Merca lo sostene diferente inversion hopi potencial cu a wordo screening pa Merca. Ademas nan ta inversionnan cu tin e sosten di gobierno Mericano. Pero tambe nan ta inversion cu tin acceso na e fondonan publico di Merca. E parlamentario a los cu nan ta proyectonan hopi bunita cu pronto den transcurso di e luna aki lo wordo anuncia.

Parlamentario Croes a bisa cu nan a haya oportunidad pa haci pregunta manera si gobierno Merca mester cambia den cuadro di eleccion di diamars ultimo, kico esaki lo nifica pa tur locual tin ariba mesa actualmente pa Aruba. “E contesta agradabel tabata cu nada lo cambia.” el a bisa.

Ya caba e parlamentario ta premira cu 2021 lo bay habri cu un aña hopi alentador. Despues di un aña 2020 cu ta un aña “toch hopi menos bon pa nos.”