Parlamentario Endy Croes, kende ta un di e miembronan mas critico di e fraccion di MEP, ta haya cu e anuncio di mandatario Otmar Oduber su retiro, principalmente como minister pero tambe for di politica, no ta nifica cu e actual gobierno di gabinete Wever-Croes ta confronta un crisis of instabilidad gubernamental.
“Absolutamente mi no ta kere cu esey lo bay mishi cu nada di e constelacion pa cu e coalicion”, el a bisa. Croes ta opina cu si lo tin cualkier desbalansa den coalicion, e por pasa si Otmar Oduber t’ey of no t’ey.
Croes no ta comparti e pensamento cu e retiro di Oduber, kende ta lider di POR cu ta e partido clave pa mantene e gobierno di coalicion (MEP-POR-RED), por crea instabilidad den e gabinete actual. El a bisa esaki pasobra tin un acuerdo di gobernacion firma entre e tres partidonan y e tres lidernan, cu ta representa e vision unda nan ta bay.
“Mi ta kere sigur den e calidad fenomenal cu nos tin den Evelyn Wever-Croes, cu ta un persona cu ta scucha tur hende. Cu ta scucha tur inkietud…”, Croes a bisa.
Cu Otmar Oduber of sin dje, e ta haya cu e partidonan den coalicion mester sigui e acuerdo. Ademas, e ta convenci cu e gabinete aki lo cumpli cabalmente su termino di 4 aña, manera nos constitucion ta prescribi. E ta spera cu ohala e ultimo dos añanan, nan lo por profila den e promesanan cu nan haci durante campaña. “Y cu pueblo por sinti di berdad y comparti, aunke tiki tiki, e prosperidad. Y di e manera ey duna nos e honor tambe di un proximo eleccion”, el a bisa.
Igualmente Croes ta sigur cu e mandatario Oduber, despues di dia 12 di december cu e lo baha como minister, lo keda sostene e partido cu e mes a lanta. E legislado ta haya logico cu si un persona ta lanta un partido, e ta keda sostene e partido na final di dia. Pues e lo keda duna su partido e consehonan necesario cu su experiencia politico riba e tereno aki.
E parlamentario tabatin palabra di elogio pa e carera politico cu Oduber a realisa den mas cu dos decada. “Otmar a haci un hazaña politico. Baha como minister y lanta un partido den tempo record. Saca dos asiento y bira minister”, el a bisa. Segun Croes, prome biaha den historia politico di nos pais, Otmar Oduber ta bay como e unico persona cu dos biaha boluntariamente ta entrega un posicion di minister. “No cu e ta wordo baha sino cu e mes a bay entrega boluntariamente”, el a agrega.
E prome biaha cu minister Otmar Oduber a entrega su retiro cerca Gobernador tabata durante e ultimo periodo di e gabinete Mike Eman II. Y diamars di e siman aki, el a anuncia su retiro oficialmente for di gobierno, pero tambe for di arena politico, den presencia di su coleganan di gabinete actual. E biaha aki no tabata debi na discrepancia cu su coleganan, manera a yega di sosode den e gobierno anterior, sino pa motibo familiar y di salud, segun e Croes a finalisa.
